Сяргей Сацук пасля допыту ў СК: справа па хабары, а капаюць ад а да я

— Артыкул застаўся той жа, але капаюць ва ўсіх напрамках, — працягвае Сяргей Сацук. — Следчых цікавяць мае WebMoney, атрыманне крэдытаў, нейкія даведкі, дамовы з ІП, што падпісваў, а што не.

Сустрэчы са следчым праходзяць амаль кожны дзень. Сёння размова доўжылася каля трох гадзін. Па адчуваннях журналіста, справа прымае "смешны напрамак". Ён пакуль не можа зразумець ходу думак следчых.

— Я атрымліваў у банку крэдыт на куплю машыны, падаў даведку — усе звесткі правільныя, але там паўсталі пытанні з подпісам, — кажа ён. — Я пакуль не магу агучваць, якія менавіта. Складу злачынства няма наогул, але ўсё роўна яны чапляюцца.

І вось яшчэ адна гісторыя:

— Сёння мяне спыталі, ці магу я даць доступ да сваіх віртуальных кашалькоў? Сказаў, што не магу пакуль адказаць, гатовы ці не, таму што следства носіць абвінаваўчы ўхіл. Па прыходных аперацыях я ўсё задэклараваў, а на што траціў грошы — адказваць не хачу, як і расказваць — каму, што і за што пералічваў, каб не падстаўляць людзей. Якое дачыненне гэта мае да меркаванага хабару?

Сяргей Сацук успамінае, што пасля першага допыту ў яго была надзея на справядлівасць, следчы яму спадабаўся. Але цяпер надзеі не засталося зусім.

— На кожным допыце проста даюць зразумець, які я дрэнны чалавек. Быццам такога нягодніка выкапалі — проста жах! — расказвае журналіст.

Ці баіцца рэдактар "Ежедневника", што яго пасадзяць?

— Жонцы сказаў, што, як на мяне, — адседзеў бы некалькі гадоў, паправіў бы здароўе, зарадкай бы заняўся, на якую часу не хапае, пахудзеў бы, — жартуе Сяргей. — Толькі за сям'ю перажываю. Ведаю, што жонка з яе здароўем гэтага не перанясе. Тут — канешне, баюся. Вельмі.

Сяргея Сацука падазраваюць у хабарніцтве. Паводле звестак Камітэта дзяржаўнага кантролю Беларусі, Сацук на пасадзе галоўнага рэдактара і ўладальніка інтэрнэт-часопіса "Ежедневник" узяў 5000 долараў для падрыхтоўкі і публікацыі на сваім сайце артыкула, які змяшчае "дыскрымінуючую інфармацыю супраць канкурэнтаў бізнес-суб'екта — Animed".

Некалькі месяцаў таму Сяргей Сацук адчуў ціск з боку ўладаў і пакінуў тэкст Еўрарадыё на выпадак ягонага затрымання.