У МЗС Польшчы адказалі на запрашэнне паназіраць за вайсковымі вучэннямі АДКБ

У Міністэрстве замежных спраў Польшчы не ўспрынялі сур'ёзна запрашэнне Беларусі паназіраць за вайсковымі вучэннямі АДКБ "Баявое братэрства — 2023". Што такое запрашэнне было, 31 жніўня заявіў Аляксандр Лукашэнка.  Ён тады казаў, што "мы гатовыя да аднаўлення добрых адносін са сваімі суседзямі".

"Белсат" накіраваў запыт у МЗС Польшчы з пытаннем, ці было запрашэнне і як на яго адказалі. У польскім знешнепалітычным ведамстве пацвердзілі, што запрашэнне прыходзіла. Паназіраць за вучэннямі запрашалі дыпламатаў, якія знаходзяцца ў Мінску. Але ў Варшаве палічылі, што "на фоне ўсіх правакацыйных беларускіх дзеянняў супраць Польшчы, якія ўплываюць на істотнае пагаршэнне сітуацыі ў рэгіёне", запрашэнні такога кшталту выглядаюць як прапагандысцкія дзеянні.

"Яны не спрыяюць павелічэнню ўзаемнага даверу або рэальнай празрыстасці дзеянняў", — растлумачылі ў МЗС Польшчы. У адказе таксама пералічваліся дзеянні Беларусі супраць Польшчы, якія выклікаюць трывогу і бачацца як правакацыйныя: міграцыйны прэсінг, вучэнні ля межаў, прысутнасць наймітаў групы "Вагнер", непрыязныя выказванні Лукашэнкі і інфармацыя пра размяшчэнне ядзернай зброі.

Вучэнні “Баявое братэрства — 2023" пачаліся 1 верасня і працягнуцца да 6-га. У іх бяруць удзел вайскоўцы дзяржаў Арганізацыі Дагавора аб калектыўнай бяспецы: Беларусі, Расіі, Казахстана, Кыргызстана і Таджыкістана. Прадстаўнікі Арменіі адмовіліся ўдзельнічаць у вучэннях — Ерэван раней дапускаў выхад з АДКБ.