Volkswagen можа закрыць заводы, а фанаты "Гары Потэра" абурыліся — #ІхНоравы

03/09/2024 - 16:57

Міжнародныя навіны / @rubanau_collage

Пакуль "Тытанік" "раскладаецца" на дне Атлантыкі, змеі пажыраюць сабе падобных, а фанаты "патэрыяны" асвістваюць адміністрацыю вакзала Кінгс-Крос, Volkswagen чакаюць цяжкія часы.

Пра ўсё па парадку — у нашым штодзённым аглядзе міжнародных навін.

Volkswagen можа закрыць заводы і звольніць сваіх супрацоўнікаў у Германіі

Нямецкі канцэрн Volkswagen можа закрыць некалькі заводаў у Германіі і звольніць супрацоўнікаў, піша Euronews.

Кіраўніцтва канцэрна вырашыла адмовіцца ад гарантый занятасці, якія з 1994 года былі прапісаныя ў працоўных дамовах. Кампанія не збіраецца выконваць абяцанне не скарачаць персанал да 2030 года.

"Еўрапейская аўтамабільная прамысловасць знаходзіцца ў вельмі складанай і сур'ёзнай сітуацыі", — сказаў Олівер Блюме, генеральны дырэктар Volkswagen Group. Ён спаслаўся на з'яўленне новых ігракоў на еўрапейскіх рынках і заявіў пра неабходнасць "дзейнічаць рашуча".

Кампанія імкнецца скараціць выдаткі, у прыватнасці, за кошт датэрміновага вываду на пенсію супрацоўнікаў, што дазваляе пазбегнуць прымусовых звальненняў. Аднак гэтых захадаў можа быць недастаткова.

Частка носа "Тытаніка" абрынулася і лягла на дно акіяна

Непашкоджаная частка насавой агароджы "Тытаніка" абрынулася і ўпала на дно Атлантычнага акіяна. Пра гэта сведчаць кадры апошняй экспедыцыі да патанулага лайнера, праведзенай RMS Titanic Inc. Кампанія валодае выключнымі правамі на выцягванне аб'ектаў з судна, патанулага ў 1912 годзе і якое ляжыць на глыбіні амаль 4 км.

Частка агароджы лайнера набыла найбольшую вядомасць па культавай сцэне з фільма Джэймса Кэмерана, у якой Роза і Джэк стаяць на парэнчах карабля, гераіня Кейт Уінслет крычыць "Я лячу!", а на фоне грае "My Heart Will Go On" Селін Дыён.

Участак левага борта даўжынёй каля 4,6 м цяпер ляжыць на адлегласці ад носа лайнера — у RMS Titanic Inc. мяркуюць, што фрагмент абрынуўся за апошнія два гады.

У заяве кампаніі гаворыцца, што разбурэння "Тытаніка" не пазбегчы: судна, якое праляжала на марскім дне ўжо 112 гадоў, паступова губляе сваё аблічча.

Па словах прадстаўнікоў RMS Titanic Inc., гэта ў чарговы раз пацвярджае "важнасць місіі захоўваць і дакументаваць" спадчыну легендарнага карабля, "пакуль не стала занадта позна".

У Бангладэш адна гіганцкая змяя праглынула іншую

Навукоўцы задакументавалі сустрэчу двух асобін самага буйнога ў свеце віду змей недалёка ад горада Чытагонг у Бангладэш, піша BILD. Трохметровы тыгровы пітон праглынуў жыўцом прыкладна такога самага па памеры сеткаватага пітона.

Паводле справаздачы, апублікаванай у спецыялізаваным часопісе Reptiles and Amphibians, тыгроваму пітону спатрэбілася каля двух гадзін, каб цалкам заглынуць сваю здабычу.

Пітоны вырастаюць да некалькіх метраў у даўжыню, у некаторых выпадках — нават да шасці метраў. Яны забіваюць сваю здабычу, душачы яе, а потым з'ядаючы. Праз свае памеры пітоны ўяўляюць небяспеку і для чалавека — асабліва, калі змяя адчувае пагрозу.

Навукоўцы пакуль не зразумелі, чаму адзін пітон з'еў другога: на тэрыторыі, дзе яны жывуць, водзіцца вялікая колькасць курэй, якіх значна прасцей ператравіць. Мяркуюць, што такім чынам яны змагаюцца за тэрыторыю.

Фанаты "Гары Потэра" абурыліся адменай штогадовага "адпраўлення" цягніка "Хогвартс экспрэс"

Фанатаў "Гары Потэра", якія сабраліся на лонданскім вакзале Кінгс-Крос, засмуціла тое, што адміністрацыя станцыі скасавала штогадовае "адпраўленне" цягніка "Хогвартс экспрэс" з платформы 9¾, піша The Guardian.

Мерапрыемства ў тым выглядзе, як гэта апісваецца ў кнігах Джоан Роўлінг, праводзілася 1 верасня ў 11:00. Рэйс у вёсачку Хогсмід, непадалёк ад якой размяшчаецца Хогвартс, адлюстроўваўся на табло. Пра яго таксама аб'яўлялі ў гучнагаварыльнік.

Аднак адміністрацыя вакзала вырашыла адмяніць гэтае мерапрыемства, пра што Warner Bros. Discovery, якой належыць франшыза пра Гары Потэра, паведаміла яшчэ ў ліпені.

Тады кампанія патлумачыла: 1 верасня 2023-га на вакзал прыехалі тысячы людзей, што выклікала праблемы ў рабоце.

Але прыхільнікі "Гары Потэра" усё роўна прыехалі на вакзал, адлічвалі секунды да "адпраўлення", а пасля абсвісталі адміністрацыю станцыі за адмену мерапрыемства.