З Кейт Мідлтан усё ў парадку. Астатнія навіны не вельмі — #IхНоравы

01/03/2024 - 12:13

#ІхНоравы / Калаж Улада Рубанава

Шмат добрых навін не абяцаем. Але важных будзе дастаткова.

"Акуратныя" стрэлы ў паветра з танкаў

Новая трагедыя адбылася ў сектары Газа на гэтым тыдні. Калона з 30 грузавікоў з егіпецкай гуманітаркай рухалася на поўнач Сектара. У нейкі момант калону атачылі людзі, адчайна спрабуючы атрымаць неабходную дапамогу. Яны залазілі на машыны і стаялі вакол іх.

Адзін з відавочцаў расказаў ВВС, што выйшаў на дарогу, спадзеючыся атрымаць мяшок мукі, каб пракарміць сям'ю. Але ўсё абярнулася хаосам. Розныя бакі расказваюць сваю версію падзей. У выніку здарэння 112 палестынцаў былі забітыя і яшчэ 760 параненыя. Такія лічбы называе Міністэрства аховы здароўя Газы (яго кантралюе ХАМАС).

Побач з натоўпам знаходзіліся ізраільскія танкі. Вайскоўцы ЦАХАЛ сцвярджаюць, што зрабілі папераджальныя стрэлы, спрабуючы "асцярожна разагнаць натоўп". Ізраіль заяўляе, што не страляў па канвоі.

"Некаторыя пачалі жорстка штурхаць і нават затоптваць іншых жыхароў Газы да смерці, рабуючы гуманітарныя грузы, — сказаў галоўны прадстаўнік ЦАХАЛа контр-адмірал Даніэль Хагары. — У выніку гэтага няшчаснага інцыдэнту дзясяткі жыхароў Газы былі забітыя і параненыя".

ЦАХАЛ настойвае, што вайскоўцы проста спрабавалі дапамагчы калоне з гуманітаркай дабрацца да месца прызначэння.

Але некаторыя палестынцы кажуць, што танкі стралялі проста па іх. Адзін са сведкаў трагедыі кажа, што большасць людзей загінула, бо кіроўцы грузавікоў паехалі наперад, нягледзячы на людзей, якія акружылі іх.

Рада Бяспекі ААН запланавала экстраннае пасяджэнне за зачыненымі дзвярыма, на якім абмяркуюць тое, што здарылася. Відавочна, здарэнне не дапаможа пасярэднікам у дасягненні часовага спынення агню паміж Ізраілем і ХАМАС.

ААН папярэджвае, што на поўнач Газы насоўваецца голад. Паводле ацэнак Арганізацыі, там жыве 300 тысяч чалавек — на ўсіх невялікая колькасць ежы і вады.

Ой, і ты тут?

Прэзідэнт ЗША Джо Байдэн і патэнцыйны прэзідэнт ЗША Дональд Трамп паехалі на мяжу. Мэта паездкі — прадэманстраваць напярэдадні выбараў, што кожны з іх занепакоены праблемай нерэгулярнай міграцыі.

Трамп з Байдэнам у паездцы не перасекліся, хоць былі ўсе шанцы выпадкова сутыкнуцца. Пакуль Трамп сустракаўся з губернатарам штата (рэспубліканцам), Байдэн паехаў размаўляць з памежнікамі. І пажартаваў, маўляў, не ведаў, што ягоны "добры сябар" Трамп таксама сёння будзе ў Тэхасе.

Як бачыць рашэнне міграцыйнага крызісу Трамп, мы памятаем з яго мінулага тэрміну. Пабудаваць на мяжы з Мексікай агароджу, дый усё. Зрэшты, калі некалькі гадоў таму мы смяяліся з метадаў Трампа, то цяпер не да смеху. Мексіку яшчэ не абнеслі такім шчыльным плотам, як Беларусь (нашы краіны-суседкі з боку ЕС як маглі спрабавалі справіцца з раптоўным міграцыйным крызісам на мяжы).

А якія метады ў Байдэна? Дзве партыі ў Палаце прадстаўнікоў аб'ядналіся, каб распрацаваць міграцыйную рэформу, якая задавальняла б усіх. Але... рэспубліканцы заблакавалі яе. Цяпер дэмакраты думаюць, што такім чынам Трамп хоча скрасці ў іх перамогу на выбарах.

КНДР працуе па поўнай

Ваенныя заводы ў КНДР працуюць на ўсю катушку і вырабляюць зброю і снарады для Расіі, кажуць у Міністэрстве абароны Паўднёвай Карэі.

Роля Паўночнай Карэі ў расійскай вайне як бы сакрэтная, але сусветная супольнасць у курсе, што Кім Чэн Ын дапамагае Уладзіміру Пуціну папоўніць запасы, якія сканчаюцца. Паўночнакарэйскі дыктатар выменяў у Пуціна зброю на ежу. Крэмль у абмен за снарады пастаўляе ў КНДР прадукты і іншыя прадметы першай неабходнасці, піша CNN.

Тым часам адзін з галоўных памочнікаў Украіны — Вашынгтон — ніяк не можа ўзгадніць аб'ёмы дапамогі.

Ёсць праблема

Больш за мільярд чалавек у свеце жывуць з атлусценнем. Такія звесткі апублікаваў часопіс The Lancet. Па дадзеных на 2022 год, ад атлусцення цярпіць 880 млн дарослых і 159 млн дзяцей.

Самыя высокія паказчыкі атлусцення сярод жанчын — у Тонга (гэта астраўная дзяржава ў Акіяніі) і Амерыканскім Самоа (астраўная тэрыторыя ЗША ў Ціхім акіяне). А для мужчын — у Самоа і Науру (і гэта таксама ў Акіяніі).

Міжнародная група навукоўцаў заяўляе, што трэба тэрмінова змяніць падыходы да барацьбы з атлусценнем. Яно можа справакаваць рызыку развіцця многіх сур'ёзных захворванняў, ад хваробы сэрца і дыябету другога тыпу да некаторых відаў раку.

Кейт у парадку

Памятаем, памятаем, вам патрэбныя і добрыя навіны (нам — таксама). З брытанскай герцагіняй Кейт, жонкай прынца Уіяльяма, усё ў парадку! Прынамсі, так запэўнівае Кенсінгтонскім палац.

С Кейт Миддлтон всё в порядке. Остальные новости не очень — #ИхНравы

Уільям і Кейт, герцаг і герцагіня Кембрыджскія / GETTY

Кейт даўно не з'яўляецца на публіцы, грамадскасці вядома, што ў яе праблемы са здароўем. І каб спыніць чуткі, палац сказаў: шаноўныя, Кейт адчувае сябе добра! Да выканання каралеўскіх абавязкаў герцагіня вернецца паводле плану пасля Вялікадня.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.