"З мэтай нагнятання незадаволенасці" трымала белыя кветкі і паветраныя шарыкі
Акцыя з кветкамі ў Мінску каля Камароўскага рынку, жнівень 2020-га / Еўрарадыё, архіўнае фота
У судзе Дзяржынскага раёна 46-гадовую Таццяну Залатар асудзілі на 1 год "хатняй хіміі", пішуць праваабаронцы.
Жанчыну прызналі вінаватай паводле ч. 1 арт. 342 КК (актыўны ўдзел у дзеяннях, якія груба парушаюць грамадскі парадак) за ўдзел у акцыі пратэсту, якая прайшла ў Фаніпалі 14 жніўня 2020 года.
Паводле версіі пракуратуры, Таццяна Залатар "з мэтай нагнятання незадаволенасці і напружанасці дэманстравала паветраныя шарыкі, кветкі белых колераў, якія выкарыстоўваліся ў якасці сімвалаў пратэснага руху".
Жанчына на судзе цалкам прызнала сваю віну.
У 2020-м годзе ўдзельнікаў акцый з кветкамі ў Беларусі нярэдка адпраўлялі на "суткі".
