Захад не прызнаў "выбары" прэзідэнта Беларусі яшчэ да дня галасавання. Рэакцыі
Сабралі рэакцыі заходніх палітыкаў / pixabay.com
26 студзеня, у атмасферы страху і рэпрэсій, у Беларусі праходзяць "выбары" прэзідэнта. Яшчэ да асноўнага дня галасавання еўрапейскія палітыкі і некаторыя парламенты выступілі з заявамі адносна выбарчай кампаніі і прызнання вынікаў.
Еўрарадыё сабрала некаторыя з іх.
Фікцыяй назвала прэзідэнцкія "выбары" ў Беларусі прэзідэнтка Еўрапейскага парламента Раберта Метсола.
"Маё пасланне народу Беларусі: трымайцеся, мы вас падтрымліваем, час дыктатуры скончыцца. Дэмакратыя пераможа", — напісала яна на сваёй старонцы ў сацыяльнай сетцы X.
Tomorrow’s election in Belarus is a sham.
— Roberta Metsola (@EP_President) January 25, 2025
My message to the people of Belarus is: keep strong, we have your back, the time of dictatorship will be over.
Democracy will prevail.
Вярхоўны прадстаўнік ЕС па замежных справах і палітыцы бяспекі Кая Калас таксама ахарактарызавала "выбары" як фікцыю.
"Лукашэнка трымаецца за ўладу ўжо 30 гадоў. Заўтра ён зноў прызначыць сябе прэзідэнтам на чарговых фіктыўных выбарах", — адзначыла яна ў X.
Lukashenko has clung to power for 30 years.
— Kaja Kallas (@kajakallas) January 25, 2025
Tomorrow, he’ll reappoint himself in yet another sham election.
This is a blatant affront to democracy.
Lukashenko doesn’t have any legitimacy.
Еўрапарламент у сваёй рэзалюцыі заклікаў краіны ЕС і ўсё міжнароднае супольніцтва "катэгарычна адхіліць маючыя адбыцца прэзідэнцкія выбары ў Беларусі і перадвыбарчую кампанію як фіктыўныя, бо яны не адпавядаюць мінімальным міжнародным стандартам дэмакратычных выбараў", а таксама працягваць палітыку непрызнання легітымнасці Аляксандра Лукашэнкі на пасадзе прэзідэнта Беларусі.
Эстонскія дэпутаты таксама выступілі з заявай адносна "выбараў" у Беларусі.
"Дыктатар Беларусі ўладкоўвае фарс, а не выбары", — гаворыцца ў заяве камітэта па замежных справах Рыйгікогу.
"Камітэт Рыйгікогу адмаўляецца прызнаваць так званыя выбары, якія адбываюцца пад поўным кантролем рэжыму, і заклікае пры першай магчымасці арганізаваць свабодныя і дэмакратычныя выбары прэзідэнта Беларусі з міжнародным назіраннем з боку АБСЕ і іншых міжнародных арганізацый", — адзначаецца ў заяве эстонскіх парламентарыяў.
Сейм Латвіі таксама прыняў рэзалюцыю аб непрызнанні "выбараў" у Беларусі, якую падтрымала большасць дэпутатаў.
"Выбары" прэзідэнта праходзяць у Беларусі 26 студзеня. Апазіцыйных кандыдатаў на іх няма. Перадвыбарчая кампанія праходзіць у атмасферы страху і рэпрэсій, якія працягваюцца з 2020 года.
