5 тон фекалій пасля фестывалю хіпі, а Раналду і Месі больш не топ — #ІхНоравы

05/09/2024 - 14:34

Міжнародныя навіны / @rubanau_collage

На несанкцыянаваным фестывалі хіпі ў Германіі, які праходзіў у прыродным запаведніку, адпачыла амаль 2 тысячы чалавек. Паліцыя не стала іх разганяць... бо тыя пачалі танцаваць перад імі галяком. Калі ўсё скончылася, выявілася, што хіпі пакінулі пасля сябе каля 5 тон фекалій.

Падрабязней пра гэта і пра іншыя навіны чытайце ў нашым штодзённым аглядзе.

Раналду і Месі ўпершыню за 21 год не ўвайшлі ў спіс прэтэндэнтаў на "Залаты мяч"

39-гадовы партугалец Крышціяну Раналду і 37-гадовы аргенцінец Ліянэль Месі ўпершыню з 2003 года не ўвайшлі ў спіс прэтэндэнтаў на "Залаты мяч" (прыз найлепшаму гульцу ў свеце), паведамляе L'Еquipe.

Спіс з 30 намінантаў апублікавалі на сайце УЕФА.

Сёлета ўсе футбалісты, якія трапілі ў спіс, гуляюць у еўрапейскіх чэмпіянатах. З 2023 года Раналду выступае за саудаўскі клуб "Ан-Наср", а Месі — за "Інтэр Маямі" з амерыканскай лігі MLS.

У папярэднія гады Крышціяну Раналду і Ліянэль Месі не толькі стабільна траплялі ў спіс прэтэндэнтаў на "Залаты мяч", але і рэгулярна выйгравалі гэтую ўзнагароду.

Партугалец атрымліваў яе пяць разоў (2008, 2014, 2015, 2016 і 2017), а аргенцінец — восем (2009, 2010, 2011, 2012, 2015, 2019, 2021 і 2023).

У спісе футбалістаў, якія атрымалі найбольшую колькасць "Залатых мячоў" за ўсю гісторыю ўзнагароды (уручаецца з 1956 года), Месі займае першае месца, а Раналду — другое.

14-гадовы вучань забіў чатырох чалавек у амерыканскай школе

4 верасня ў школе "Апалачы" ў амерыканскім горадзе Уіндэр, штат Джорджыя, адбылася страляніна — чатыры чалавекі загінулі, яшчэ дзевяць атрымалі раненні.

Паводле звестак крыніц CNN, колькасць пацярпелых можа дасягаць трыццаці.

Агонь, як мяркуецца, адкрыў падлетак — 14-гадовы вучань школы "Апалачы" Кольт Грэй. Ён затрыманы ФБР. Паводле кіраўніка Бюро расследаванняў штата Крыса Озі, Грэю выставяць абвінавачанні ў забойстве. Прычым судзіць яго будуць як паўналетняга.

Озі дадаў, што ахвярамі страляніны сталі два настаўнікі і два вучні. Пацярпелых даставілі ў бальніцу. Для шпіталізацыі як мінімум аднаго з іх спатрэбіўся верталёт.

Пракурор просіць аднавіць справу ў дачыненні да акцёра Алека Болдуіна

Спецыяльны пракурор штата Нью-Мексіка Кары Морысі скіравала зварот да суда з просьбай перагледзець рашэнне пра спыненне справы ў дачыненні да Алека Болдуіна і аднавіць яе ў апеляцыйным парадку, піша Associated Press.

У ліпені 2024 года суд зняў з акцёра абвінавачанні ў ненаўмысным забойстве аператаркі Галіны Хатчынс. Па гэтай справе Болдуіну пагражала да 18 месяцаў турмы.

У ліпені суддзя прыйшла да высновы, што ў справе сапраўды былі дапушчаныя парушэнні, і закрыла яе без права аднаўлення, спаслаўшыся на неправамерныя дзеянні паліцыі.

Увосень 2021 года падчас здымак фільма "Іржа" Болдуін выпадкова застрэліў 42-гадовую Хатчынс. Выявілася, што пісталет, якім па сюжэце фільма карыстаўся акцёр, быў зараджаны не халастымі патронамі, а баявымі.

Улады Ніжняй Саксоніі пасля фестывалю хіпі знайшлі ў зямлі прыкладна пяць тон фекалій

Каля дзвюх тысяч хіпі з руху "Вясёлкавая сям'я" тры тыдні жылі ў прыродным запаведніку ў гарах Гарц у нямецкай Ніжняй Саксоніі, піша BILD.

Амаль усе ўдзельнікі фестывалю хадзілі голымі і жылі "ў гармоніі з прыродай". Пасля таго як хіпі з'ехалі, мясцовыя ўлады пачалі падлічваць нанесеную шкоду.

"Лясная падсцілка вытаптаная нагамі, наземная расліннасць валяецца, а ўчасткі моху вырваныя і знішчаныя. Утрыманне нітратаў у глебе натуральным чынам павялічылася ў выніку спаражненняў", — гаворыцца ў справаздачы.

Чыноўнікі нават падлічылі, колькі менавіта фекалій пакінулі пасля сябе насельнікі лагера. З разлікаў вынікае, што хіпі закапалі ў зямлю не менш за пяць тон калу. Удзельнікі фестывалю карысталіся спецыяльна выкапанымі траншэямі, а потым засыпалі іх зямлёй і попелам.

Фестываль не быў узгоднены з мясцовымі ўладамі і фактычна праходзіў нелегальна, аднак паліцэйскія не змаглі выгнаць хіпі з запаведніка. Калі праваахоўнікі прыйшлі на фестываль, яго ўдзельнікі пачалі танцаваць голымі вакол паліцэйскіх.