Агрэніч: “На Беларусі Бог жыве” — добрая ідэя, якая дае сілы ісці наперад
6 траўня ў эфіры Еўрарадыё — выкладчыца польскай мовы Цэнтра славянскіх моў і культур Аліна Агрэніч.
Так атрымалася, што беларуская нацыя прыйшла да сітуацыі, калі беларусамі не столькі нараджаюцца, колькі становяцца. Не па пашпарце беларусамі, а сапраўднымі. Тымі, для каго Беларусь не проста месца прапіскі ці жыхарства ў цяперашні момант, а — Айчына. Са сваёй мовай, культурай, традыцыямі, гісторыяй і сваімі нацыянальнымі сімваламі. І прыняццем таго факта, што “на Беларусі Бог жыве”, перакананая Аліна Агрэніч.
Пра тое, як нацыі, якая жыве на скрыжаванні некалькіх культур, захаваць сваю адметнасць і чаму сёння нам так важна верыць у любоў і праўду, мы і разважаем у праграме “Ідэя Х” з Алінай Агрэніч.
Набыць кнігу "Беларуская нацыянальная ідэя" (PDF) можна тут
Філосафы і мысляры мінулага сцвярджалі, што нацыянальная ідэя павінна быць у кожнай нацыі. Кіраўнік сённяшняй незалежнай Беларусі перакананы, што мы яшчэ да сваёй нацыянальнай ідэі не дараслі. Іншыя сцвярджаюць, што такая ідэя ў беларусаў ёсць.
Дык ёсць у беларускай нацыі свая нацыянальная ідэя ці не? І калі мы да сваёй націдэі яшчэ не дараслі, то ці можам лічыцца нацыяй? Магчыма, нам варта ўзяць ды сфармуляваць такую ідэю для беларусаў?
На нашу думку, прыспеў час распачаць дыскусію і вызначыць, сфармуляваць беларускую нацыянальную ідэю. І мы працягваем гэта рабіць у аўтарскай праграме “Ідэя Х”, якую па-ранейшаму вядуць рэдактар Еўрарадыё Зміцер Лукашук і маскоўскі філосаф Максім Гаруноў.
Па завядзёнцы ў якасці гасцей, якія дапамагаюць нам фармуляваць нацыянальную ідэю, — палітыкі і літаратары, эканамісты і музыканты, айцішнікі і культуролагі. Усе вы.
Праграма выходзіць штотыдзень у панядзелак і чацвер у 14:00.
Партнёры праграмы — крама з нацыянальным каларытам Symbal.by і грамадская кампанія "Годна".
Папярэднія выпускі праграмы "Ідэя Х" можна глядзець тут:
