Ашуканцы пачалі тэлефанаваць беларусам ад імя работнікаў "Белпошты"
Аддзяленне "Белпошты" / Sb.by
У Беларусі пачасціліся выпадкі тэлефоннага махлярства, калі званкі грамадзянам робяць нібыта ад імя супрацоўнікаў "Белпошты", паведамляе аператар нацыянальнай паштовай сеткі.
Зламыснікі прапануюць паўдзельнічаць у акцыі або розыгрышы. Для гэтага грамадзянам трэба адказаць па тэлефоне на некалькі пытанняў і адправіць варыянты адказу на прапанаваныя нумары або перайсці па адпраўленых спасылках на фальшывыя сайты.
У выніку ашуканцы атрымліваюць доступ да мабільных тэлефонаў грамадзян і магчымасць іх заблакаваць. Пасля гэтага злачынцы могуць завалодаць дадзенымі банкаўскіх карт.
"Белпошта" папярэджвае, што не праводзіць ніякіх акцый і розыгрышаў праз званкі на мабільныя тэлефоны.
Як паведамляла Еўрарадыё, тэлефонныя ашуканцы зарабляюць на беларусах сотні тысяч рублёў у месяц. Гэтая тэндэнцыя набірае абароты з 2016 года.
