БАТЭ рыхтуецца да бітвы з ПСВ
![БАТЭ рыхтуецца да бітвы з ПСВ](/sites/default/files/styles/gallery_main/public/2023-08/28.08.2018_press_42.jpg.webp?itok=AE1TbQ-T)
Барысаўскі БАТЭ ў Эйндховене рыхтуецца да матчу ў адказ плэй-оф футбольнай Лігі чэмпіёнаў з ПСВ. Ён пройдзе 29 жніўня, пачатак а 22-й гадзіне паводле беларускага часу. Жывая трансляцыя — на тэлеканале "Беларусь 5". На стадыёне "Філіпс", які змяшчае 35 тысяч заўзятараў, чакаецца аншлаг. У першым паядынку ПСВ на "Барысаў-Арэне" выйграў з лікам 3:2. Барысаўчанам, каб прайсці ў групавы раўнд Лігі чэмпіёнаў, трэба забіваць не менш за два мячы і не прапускаць. Задача амаль нерэальная.
![БАТЭ рыхтуецца да бітвы з ПСВ](/sites/default/files/paragraphs/image/28082018press54.jpg)
Галоўны трэнер Аляксей Бага спадзяецца на "станоўчы вынік". "Прафесіяналізм і майстэрства нашых футбалістаў дазваляюць на гэта спадзявацца", — сказаў ён у Эйндховене на перадматчавай прэс-канферэнцыі. А Станіслаў Драгун агучыў "план перамогі": забіць хуткі гол, а ў канцы паядынка — другі. "Думаю, гэтага будзе дастаткова", — адзначыў футбаліст.
Тым часам "Прессбол" падлічыў, што калі БАТЭ сенсацыйна пройдзе ПСВ, клуб заробіць, як мінімум, 15 мільёнаў еўра. У выпадку няўдачы барысаўчане атрымаюць амаль 8 мільёнаў еўра і будуць мець магчымасць зарабіць яшчэ, гуляючы ў групе Лігі Еўропы.