Краўчанка: перамовы з ЕС па пытанні рэадмісіі — на "фінальным этапе"
МЗС Беларусі аптымістычна ставіцца да перспектываў завяршэння перамоў з ЕС па пагадненнях аб спрашчэнні візавага рэжыму і рэадмісіі. Пра гэта на канферэнцыі “Пераасэнсаванне суверэнітэту ў сучасным свеце” распавёў намеснік міністра замежных спраў Алег Краўчанка. Ён спадзяецца, што пагадненне будзе падпісана да таго моманту, як кошт шэнгенскай візы вырасце да 80 еўра.
“Я лічу, што мы знаходзімся на цалкам пазітыўным трэке ўзаемадзеяння з еўрапейскім бокам. І я зыходжу з таго, што мы паспеем”, — сказаў намеснік міністра.
Па словах Краўчанкі, па пытанні рэадмісіі перамовы знаходзяцца на “фінальным этапе, хаця ніякіх гарантый даваць не хацелася б, таму што гэта двухбаковы працэс”.
“Я з аптымізмам гляджу на перспектыву заключэння гэтага пакета пагадненняў, — заявіў Краўчанка. — Пакуль што трэба завяршыць перамовы. Калі? Я спадзяюся, што ў гэтым годзе. Чым раней, тым лепей. Але ўсё ж так хутка гэта не бывае, таму я назваў размытыя тэрміны”.
22 сакавіка міністр замежных спраў Беларусі Уладзімір Макей заявіў журналістам, што пагадненне аб спрашчэнні візавага рэжыму паміж Беларуссю і ЕС амаль гатовае да падпісання. Па яго словах, па дакуменце былі спрэчныя моманты, але атрымалася прыйсці да сумеснага рашэння, якое дазваляе ў бліжэйшы час падпісаць дамову.
