Беларус у Польшчы выйграў суд па справе аб нацыянальнай дыскрымінацыі
Нумар на беларускім аўтамабілі / svaboda.org
Суд у Польшчы абараніў правы беларуса, які паскардзіўся на дыскрымінацыю паводле нацыянальнай прыкметы, піша "Зеркало".
У 2022 годзе грамадзянін Польшчы сказаў беларусу Ігару памяняць нумары на машыне і "сп...даляць (нецэнзурны варыянт слова "ехаць". — Еўрарадыё) да свайго Лукашэнкі".
Мужчына расказваў, як сутыкнуўся з праблемамі праз наяўнасць беларускіх нумароў на аўто: "За адзін дзень я двойчы сутыкнуўся з праблемай на дарозе. Адзін кіроўца проста падрэзаў, другі некалькі разоў моцна тармазіў, а затым выйшаў з машыны і сказаў, каб я змяніў рэгістрацыйныя нумары або "сп...даляй да свайго Лукашэнкі".
Ігар падаў заяву пра дыскрымінацыю па нацыянальнай прыкмеце. Пракуратура спярша не пабачыла ў гэтым здарэнні складу злачынства, але беларус абскардзіў рашэнне ў судзе — і справу вярнулі на перагляд. Разгляд справы пачаўся ў сакавіку.
У выніку грамадзяніна Польшчы прызналі вінаватым, аштрафавалі, абавязалі кампенсаваць усе судовыя выдаткі і выплаціць дзве тысячы злотых.
