Больш 100 тысяч кіяўлянаў застаюцца без святла

Раніцай 26 лістапада каля 130 тысячаў жыхароў украінскай сталіцы заставаліся без электрычнасці, паведамляе Кіеўская вайсковая адміністрацыя.

"Водазабеспячэнне адноўлена ў поўным аб'ёме па ўсіх раёнах горада. У кватэрах верхніх паверхаў шматпавярховікаў, якія дагэтуль абясточаны, магчымы зніжаны ціск вады. Працягваецца запуск цеплазабеспячэння", — паведамілі ў адміністрацыі.

У адміністрацыі паабяцалі, што цягам 24-х гадзін плануецца скончыць усе аднаўленчыя працы, і вада, цяпло і сувязь вернецца да працы ў штатным рэжыме.

Перабоі з электраэнергіяй і водазабеспячэннем пачаліся ў Кіеве пасля абстрэлу інфраструктуры на гэтым тыдні. У выніку ракетнага абстрэлу тры чалавекі загінулі.