"Калі вызваляць мяне аднаго, гэта будзе поўны правал", — Сянцоў
5 ліпеня ў калоніі "Белы мядзведзь" у Лабытнангі на кароткатэрміновым спатканні з незаконна асуджаным украінскім рэжысёрам Алегам Сянцовым пабывала яго сястра Наталля Каплан. Яны прагаварылі дзве гадзіны. Гэта яе першае спатканне за чатыры гады з моманту абвяшчэння прысуду ў Растове-на-Доне ў 2014 годзе.
"Я была на спатканні з Алегам Сянцовым, прагаварылі мы з ім дзве гадзіны. Гэта было кароткатэрміновае спатканне, Алег цяпер важыць 75 кг пры росце 190 см, за час галадоўкі ён страціў 15 кг", — расказала яна Грамадскаму.
Наталля Каплан распавяла Алегу пра тое, што да галадоўкі далучыўся Эмір Усейн Куку і пра акцыі ў яго падтрымку. "Ён вельмі ўдзячны, што так шмат дзеянняў вакол яго імя, што людзі не апускаюць рукі і працягваюць змагацца. Але разам з тым, ён вельмі расчараваны, што вельмі мала ўвагі іншым палітвязням, і лічыць, што калі вызваляць яго аднаго, гэта будзе поўны правал", — сказала яна.
Паводле яе слоў, Сянцоў просіць усіх, хто прыязджае да яго ў Лабытнангі, каб ездзілі не да яго, а да іншых палітвязняў, за якіх ён змагаецца.
"У прыватнасці, ён просіць (Людмілу) Дзянісаву (украінскі амбудсмэн — рэд.), незалежных лекараў, якія спрабавалі да яго прыехаць, консулаў, уладыку Клімента, каб яны прыязджалі да іншых палітвязняў, каб пра іх ніхто не забываў", — сказала Наталля Каплан.
Яна таксама распавяла, што здароўе Сянцова на сёння здавальняючае, яго стан змяняецца, аналізы не вельмі добрыя, але "нічога крытычнага няма".
"Учора яму было вельмі дрэнна, сёння — нармальна. На спатканне ён прыйшоў сам. Стан пагаршаецца ўвечары. Кажа, што яму цяпер значна лягчэй. Самы цяжкі перыяд — першыя тры тыдні галадоўкі. Цяпер яму ставяць кропельніцы. Без іх ён бы ўжо не выжыў. Спыняць галадоўку ён не збіраецца. Сказаў, што пойдзе да канца і верыць у перамогу. Настроены аптымістычна, верыць, што не проста так. І верыць у перамогу ", — сказала Наталля Каплан.
Паводле яе слоў, з забаў у яго — тэлевізар, ён таксама піша і рэдагуе свае старыя запісы. Сянцоў просіць не адпраўляць яму кнігі, якіх у яго вельмі шмат.
