Катарцы хочуць распачаць сакалінае паляванне пад Капылём, беларусы супраць
На пачатку студзеня беларускія паляўнічыя даведаліся, што прыватная гаспадарка “Белы Бор” прэтэндуе на частку паляўнічых угоддзяў у Капыльскім раёне. “Белы Бор” звязаны з катарскім бізнесам і, па словах сяброў Беларускага таварыства паляўнічых і рыбаловаў, арыентаваны на заможных замежных паляўнічых.
Прадпрыемства збіраецца ўзяць зямлю ў арэнду — беларускія паляўнічыя сумняюцца, што змогуць працягваць там паляваць і што егеры захаваюць працу.
“Пакуль пытанне перадачы [зямлі] не вырашанае, — расказаў Еўрарадыё дырэктар капыльскага аддзялення Беларускага таварыства паляўнічых і рыбаловаў Валерый Долбік. — Але ў нашу арганізацыю прыйшоў ліст, што паляўнічая гаспадарка “Белы Бор” папрасіла перадаць ім у арэнду частку паляўнічых угоддзяў”.
“Белы Бор” працуе ў Беларусі з 2015 года. Па сайце арганізацыі не адчуваецца, што яна арыентуецца на замежнікаў. Цэны ў прайс-лісце ўказаныя ў беларускіх рублях.
Тое, што гаспадарку фінансуюць катарскія бізнесмены, тут не хаваюць: “Яны [катарцы. — Еўрарадыё] спансуюць нас. Тут няма чаго хаваць. Адкуль узяліся ўсе вальеры? Ёсць спонсары, назавём гэта так”, — расказвае Еўрарадыё намеснік дырэктара гаспадаркі “Белы Бор” Дзмітрый Кахановіч.
У гаспадаркі ўжо ёсць паляўнічыя ўгоддзі ў Капыльскім і Слуцкім раёнах. Цяпер яна хоча арандаваць яшчэ 30 тысяч гектараў. Маўляў, ёсць вялікія планы. А разгарнуцца няма дзе.
“У іх [Беларускага таварыства паляўнічых і рыбаловаў. — Еўрарадыё] 120 тысяч гектараў зямлі, у мяне 19 [тысяч гектараў]. У іх няма ліцэнзіі на адстрэл аленя, а ў мяне на 47 жывёл. Таму да нас і едуць людзі, — працягвае Кахановіч. — Але і мясцовым мы не адмаўляем. Толькі ў нас усё па законе і не атрымаецца дамовіцца з егерам, каб пастраляць крыху больш. У людзей, якія блізка жывуць, нармальныя цэны, каб паляваць на зайца, аленя, лася. Нікому не патрэбны парадак, які прыйдзе на тэрыторыю”.
Як увогуле прыватнік можа абмежаваць правы капыльскіх паляўнічых?
“Яны [“Белы Бор”] не практыкуюць паляванне з ганчакамі на зайца і лісу [традыцыйнае для беларускіх мясцін. — Еўрарадыё]. У лісце пішуць, што плануюць развіваць сакалінае паляванне. Хутчэй за ўсё, гэта будзе вельмі дарагое задавальненне, наўрад ці нашыя паляўнічыя сабе такое змогуць дазволіць. Гэта не наш традыцыйны від палявання. У Туркменіі, Казахстане гэта традыцыйны від, але не ў нас”, — асцярожна скардзяцца ў капыльскай арганізацыі БТПР.
“Белы Бор” сапраўды плануе пабудаваць на арэнднай зямлі сакаліную ферму. Але абгароджваць тэрыторыю, каб там маглі паляваць выключна замежнікі, ніхто не збіраецца. Цэны для капыльскіх паляўнічых абяцаюць захаваць і нават крыху знізіць.
Галоўнай прычынай незадаволенасці прыватны арандатар бачыць тое, што ён збіраецца навесці парадак і спыніць браканьерства.
“Яны разумеюць, што на тэрыторыю БТПР пасля бардака прыйдзе гаспадарчая дзейнасць. Гэта не задавальняе нікога. Гэта не егеры скардзяцца, а насельніцтва, якое ведае, што ў нас будзе парадак”.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
