Мінлясгас запэўнівае, што ажыятаж з дровамі "практычна зняты"
Беларускі лес, 2021 год / З архіву Еўрарадыё
Ажыятаж з дровамі для беларусаў, якія падавалі заяўкі ў лясгасы, практычна зняты, паведамляе Мінлясгас. Праблемы назіраюцца толькі ў раёнах, дзе размешчаныя буйныя гарады.
Кожныя суткі лясгасы атаварваюць 1200-1400 заявак, якія ім падаюць грамадзяне. Усяго з пачатку кастрычніка лясгасы непасрэдна адгрузілі людзям каля 60 тысяч кубаметраў дроваў.
Мінлясгас у штодзённым рэжыме кантралюе адгрузку дроваў насельніцтву. На думку Міністэрства, "падагрэць цікавасць да тэмы дроў хочуць асобныя блогеры". Між тым у лясгасах ёсць "на рэштках" каля 600 тысяч кубаметраў нарыхтаванай дроўнай драўніны.
