"Міжнародная амністыя" заклікала да вызвалення 16-гадовага Мікіты Залатарова
Праваабарончая арганізацыя "Міжнародная амністыя" заклікала беларускія ўлады неадкладна вызваліць Мікіту Залатарова, які ў лютым быў асуджаны на пяць гадоў выхаваўчай калоніі.
Паводле версіі следства, 16-гадовы падлетак у кампаніі з двума маладымі мужчынамі кінуў "кактэйлі" Молатава ў бок амапаўцаў. Акрамя таго, яго абвінавацілі ў арганізацыі масавых беспарадкаў. Залатароў віну не прызнаў. Сёння ў Гомельскім абласным судзе будзе разгледжана апеляцыя на прысуд падлетку.
"Мы заклікаем да неадкладнага вызвалення Мікіты Залатарова да вынікаў апеляцыйнага слухання", гаворыцца ў заяве"Міжнароднай амністыі".
Праваабаронцы настойваюць на захаванні права на справядлівае судовае разбіральніцтва, а таксама правоў Мікіты ў адпаведнасці з Канвенцыяй аб правах дзіцяці.
Мары Стразерс, дырэктар Amnesty International па Усходняй Еўропе і Цэнтральнай Азіі нагадала, што пры затрыманні падлетка збівалі.
"Ён знаходзіўся ў папярэднім зняволенні больш за шэсць месяцаў і ў цяперашні час знаходзіцца ў адзіночным зняволенні, што для непаўналетніх раўнасільна катаванням", — адзначыла Стразерс.
Яна таксама падкрэсліла, што больш за паўгода падлетак быў пазбаўлены магчымасці вучыцца — у яго не было доступу да адукацыі.
Праваабаронцы прызналі Мікіту Залатарова палітвязнем.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.
