МЗС Літвы пракаментавала атаку на беларускія ўстановы ў Вільні
![Пабітыя шыбы ў Цэнтры беларускай культуры ў Вільні](/sites/default/files/styles/gallery_main/public/2024-09/vilnia-0509.jpg.webp?itok=Qcn4LKN-)
Пабітыя шыбы ў Цэнтры беларускай культуры ў Вільні / svaboda.org
Міністэрства замежных спраў Літвы асудзіла атаку на беларускія культурніцкія цэнтры і падтрымала беларускіх палітуцекачоў.
"Мы рашуча асуджаем акты вандалізму супраць беларускай супольнасці, учыненыя паводле сцэнара КДБ. Вінаватыя будуць прыцягнутыя да адказнасці.
Мы цалкам падтрымліваем свабодалюбівых людзей, якія змагаюцца за дэмакратычную Беларусь і яе еўрапейскую будучыню", — гаворыцца ў паведамленні МЗС Літвы ў сацсетцы Х.
Як расказвала Еўрарадыё, у ноч на 4 верасня невядомыя стралялі з пнеўматычнай зброі ў акно царквы беларускага праваслаўнага прыходу Канстанцінопальскага патрыярхату. У тую ж ноч невядомыя разбілі шыбы ў Цэнтры беларускай культуры ў Вільні.
5 верасня каля будынку прыватнага цэнтру ўцекачоў з Беларусі Dapamoga з'явіўся надпіс па-літоўску "Беларусам-паразітам тут не месца". Як адзначалася, у надпісе ёсць граматычная памылка.
Прадстаўнікі ўстановаў лічаць, што за гэтымі акцыямі стаяць спецслужбы Лукашэнкі, а мэта такіх правакацый — запалохаць беларускіх палітуцекачоў.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.