"Пераможца вядомы загадзя". Што думаюць беларусы пра "выбары"

Ці згодныя беларусы з тым, што пераможца на "выбарах" вядомы загадзя? 89% апанентаў улады выказалі поўную згоду з гэтым, большасць заўзятых прыхільнікаў не змагла адказаць, і толькі малая частка апытаных не пагадзілася з гэтай думкай.

Такія звесткі агучылі беларускія незалежныя сацыёлагі падчас прэзентацыі аналітычнага дакладу "Беларускі трэкер перамен". Гэта ўжо восьмае даследаванне аўтараў, гэтым разам прысвечанае "выбарам"-2025.

Сацыёлагі патлумачылі: тое, што адэпты ўлады лічаць вынік вядомым загадзя, неабавязкова кажа пра іх веру ў фальсіфікацыі.

"Цалкам імаверна, што ў сілу сваіх перакананняў яны проста ўпэўненыя, што на выбарах сапраўды пераможа Аляксандр Лукашэнка".

Нядаўняе даследаванне Chatham House таксама паказала, што:

- сярод прадэмакратычна настроенай аўдыторыі амаль палова агучвае відавочную адмову ад удзелу ў галасаванні;

- доля грамадзян, упэўненых у сваім удзеле, знізілася амаль удвая ў параўнанні з 2020 годам;

- толькі рэспандэнты, якія падтрымліваюць уладу, мяркуюць, што на выбарах будзе забяспечаны аб'ектыўны падлік галасоў і роўны доступ кандыдатаў да СМІ.

Са слоў аўтара даследавання, "гэта не азначае, што ўлада рэжыму ці Аляксандра Лукашэнкі не будзе адчувацца легітымнай".

"Гэта значыць толькі тое, што прырода гэтай легітымнасці будзе заснаваная на чымсьці яшчэ — напрыклад, на сілавым прымусе да пакоры або на перакананні, што толькі Лукашэнка можа забяспечыць мір і бяспеку ў краіне", — кажуць сацыёлагі.