Працягваецца русіфікацыя Купалаўскага тэатра
Рускамоўная праграмка Купалаўскага тэатра / kupalauski.by
Дзяржаўны Купалаўскі тэатр анансаваў акцыю "Лета пачынаецца ў Купалаўскім". Удзельнікі акцыі змогуць купіць квіткі на дзіцячую казку "Гісторыя шакаладнага дрэва" ўсяго за два рублі.
Але, як заўважыў сайт "Зеркало", праграмка спектакля выдадзеная па-руску. Хаця ўсе спектаклі ў тэатры, у тым ліку "Гісторыя шакаладнага дрэва", паказваюцца на беларускай мове.
Стварэнне рускамоўнай праграмкі — яшчэ адна праява русіфікацыі тэатра.
Большасць трупы Купалаўскага ўлетку 2020-га падтрымала пратэсты супраць фальсіфікацыі выбараў і гвалту сілавікоў. Калі рэжым Лукашэнкі звольніў тагачаснага дырэктара Паўла Латушку, за ім сышлі амаль усе акторы, а таксама многія тэхнічныя работнікі.
Працу тэатра адміністрацыя змагла аднавіць толькі ў сакавіку 2021-га. Аднак дастатковую колькасць актораў набраць так і не змаглі, таму іх запрасілі з Расіі.
Русіфікацыя закранула і іншыя мінскія тэатры.
