Прэмію імя Францішка Аляхновіча сёлета ўручаць не будуць
Уручэнне прэміі Аляхновіча перанеслі на наступны год
Літаратурную прэмію імя Францішка Аляхновіча сёлета ўручаць не будуць. Яе ўручэнне пераносіцца на наступны, 2023 год. Такое рашэнне прынялі заснавальнікі прэміі — Радыё "Свабода" і Беларускі ПЭН.
Прэмія імя Аляхновіча прысуджаецца за найлепшы твор, напісаны ў зняволенні. Традыцыйна яе лаўрэатаў называюць 15 лістапада — у гэты дзень у свеце адзначаецца Дзень зняволенага пісьменніка.
"Няспынныя рэпрэсіі, арышты аўтараў і выдаўцоў на працягу мінула года зрабілі амаль немагчымым публічнае з'яўленне твораў, народжаных у зняволенні. Цяпер за кратамі 11 лаўрэатаў прэміі: Ігар Аліневіч, Аляксандр Фядута, Павел Севярынец, Зміцер Дашкевіч, Алесь Бяляцкі, Мікола Дзядок, Алесь Пушкін, Андрэй Аляксандраў, Максім Знак, Мікола Папека, Андрэй Скурко", — гаворыцца ў паведамленні арганізатараў.
Паведамляецца, што на прэмію ў 2023 годзе змогуць прэтэндаваць творы, апублікаваныя цалкам ці часткова ў перыяд з лістапада 2021 па лістапад 2023 года.
