Прэзідэнт Абхазіі сышоў у адстаўку пад ціскам апазіцыі

Пад ціскам апазіцыі ў адстаўку сышоў прэзідэнт непрызнанай Абхазіі Аслан Бжанія. Таксама ў адстаўку сыходзіць кіраўнік урада Аляксандр Анкваб, паведамляе kavkaz-uzel.eu.

У сваёй заяве аб адстаўцы на імя спікера парламента Бжанія ставіць умову, што пратэстоўцы павінныя сёння ж пакінуць урадавы комплекс, іначай ён адкліча сваю заяву.

Выканаўцам абавязкаў прэзідэнтабудзе віцэ-прэзідэнт Бадра Гунба. Абавязкі кіраўніка ўрада будзе выконваць Валерый Бганба, які раней займаў гэтую пасаду.

Пратэсты ў сталіцы Абхазіі пачаліся тыдзень таму. Да гэтага мясцовых жыхароў падштурхнуў намер уладаў прыняць новае інвестыцыйнае пагадненне з Расіяй. Многія асцерагаюцца, што экспансія расійскага бізнесу пазбавіць іх заробку на турызме.

16 лістапада пратэстоўцы захапілі парламент, а Бжанія з'ехаў у сваё родавае сяло Тамыш.