Прынц Гары прайграў суд, а Apple не будзе вырабляць электрамабілі — #ІхНоравы | Навіны Беларусі

Самы бяспечны год для палётаў, і чым натхнялася рэжысёрка "Мінулых жыццяў". Пра гэта і не толькі расказваем у нашым штодзённым аглядзе міжнародных навін.

Прынц Гары прайграў у Вярхоўным судзе справу аб паніжэнні ўзроўню персанальнай бяспекі

Герцаг Сасекскі прайграў справу ў Высокім судзе супраць урада з нагоды рашэння панізіць узровень яго персанальнай бяспекі падчас наведвання Вялікабрытаніі.

Прынц Гары падаў іск супраць Міністэрства ўнутраных спраў пасля таго, як Выканаўчы камітэт па абароне каралеўскай сям'і і грамадскіх дзеячаў у лютым 2020 года прыняў рашэнне надаць яму меншую ступень дзяржаўнай бяспекі з-за рашэння пакінуць каралеўскую сям'ю.

У снежні адвакаты Гары заявілі суду, што стаўленне да яго было "незаконным і несправядлівым".

Раней у МУС заявілі, што яго бяспека вызначалася ў індывідуальным парадку.

Большая частка судовых разглядаў, якія тычацца захавання бяспекі высокапастаўленых дзеячаў, у снежні праходзіла ў прыватным парадку, а суддзя Высокага суда сэр Пітэр Лэйн вынес рашэнне ў сераду раніцай.

Гэтае рашэнне можа мець наступствы для візітаў герцага ў Вялікабрытанію ў будучыні, бо раней ён заявіў, што больш нізкі ўзровень бяспекі ўскладняе знаходжанне яго сям'і ў краіне.

У пастанове сэр Пітэр адхіліў іск герцага, заявіўшы, што рашэнне аб паніжэнні статусу бяспекі прынца Гары не было супрацьзаконным і што любое адхіленне ад палітыкі было апраўданае.

Ён пастанавіў, што рашэнне не было неабгрунтаваным і яго не запляміла працэсуальная несправядлівасць.

Мінулы год стаў самым бяспечным для палётаў. Не зафіксавалі ніводнай смерці

2023 год стаў самым бяспечным за ўсю гісторыю камерцыйных палётаў па шэрагу паказчыкаў: за 37,7 мільёна рэйсаў не было ніводнага няшчаснага выпадку са смяротным вынікам з удзелам пасажырскіх самалётаў.

Страт карпусоў пасажырскіх самалётаў таксама зафіксавана не было, паведаміла ў сераду Міжнародная асацыяцыя паветранага транспарту ў штогадовай справаздачы па бяспецы сусветнай авіяцыі за 2023 год.

Для параўнання, у 2022 годзе адбылася адна авіякатастрофа са смяротным вынікам. Наогул у мінулым годзе колькасць здарэнняў знізілася да аднаго на кожныя 1,26 мільёна рэйсаў, што з'яўляецца самым нізкім паказчыкам за дзесяцігоддзе.

Apple адмовілася ад працы над электрамабілямі

Apple адмовілася ад дзесяцігадовых намаганняў па стварэнні электрамабіля, адклаўшы праект, які некаторыя лічылі патэнцыйна трансфармацыйным для аўтамабільнай прамысловасці.

Па дадзеных Bloomberg, многіх супрацоўнікаў, якія працуюць над праектам, перавядуць у падраздзяленне штучнага інтэлекту кампаніі.

Сама Apple ніколі не пацвярджала здагадак пра тое, што яна будзе вырабляць электрамабілі. Аднак за апошнія 10 гадоў ажыццявіла некалькі крокаў, якія сведчылі, што да гэтай ідэі кампанія ставіцца сур'ёзна.

У прыватнасці, Apple наймала кіраўнікоў аўтамабільнай галіны як мінімум з 2014 года, а ў красавіку 2017 года атрымала дазвол ад Каліфарнійскага дэпартамента транспартных сродкаў на тэставанне беспілотных аўтамабіляў.

Кампанія таксама атрымала некалькі патэнтаў, звязаных з аўтамабілямі, у тым ліку адзін на сістэму віртуальнай рэальнасці для барацьбы з марской хваробай, а другі на рэгуляванне адцення вокнаў у рэальным часе.

Некаторыя эксперты меркавалі, што Apple, хутчэй за ўсё, будзе супрацоўнічаць з адным ці некалькімі аўтавытворцамі для продажу аўтамабільнай аперацыйнай сістэмы, праграмнага забеспячэння для беспілотнага кіравання або іншых звязаных тэхналогій, а не для вытворчасці электрамабіляў.

Намінаваны на "Оскар" фільм "Мінулыя жыцці" быў натхнёны досведам імігрантаў

Карэйска-канадская рэжысёрка Селін Сонг заявіла, што яе жыццё ў якасці імігранткі стала натхненнем для стварэння намінаванага на "Оскар" фільма "Мінулыя жыцці".

У прыватнасці, яна абапіралася на размову паміж сваёй сяброўкай, якая прыехала з Паўднёвай Карэі, і яе мужам у бары ў Нью-Ёрку.