Што кажуць топ-чыноўнікі, якіх замест турмы адправілі ў калгасы

Еўрарадыё звязалася з былым намеснікам генпракурора Аляксандрам Архіпавым і былым кіраўніком Чашніцкага райвыканкама Уладзімірам Булаем. Абодва экс-чыноўнікі нечакана ўзначалілі сельскагаспадарчыя прадпрыемствы. Хоць яшчэ нядаўна Архіпаў знаходзіўся ў калоніі ўзмоцненага рэжыму за карупцыю. А летась у верасні паведамлялі пра затрыманне за злоўжыванні Уладзіміра Булая.

Многія палічылі, што прызначэннем у калгасы экс-чыноўнікаў пакаралі, маўляў, замест няволі дазволілі загладзіць вінаватасць працай у калгасе.

Уладзімір Булай паразмаўляў з Еўрарадыё вельмі сцісла, паведаміў пра сваю занятасць і больш трубку не здымаў.

“Ці знятыя з вашага мужа падазрэнні?” — цікавімся ў Надзеі Булай, жонкі апальнага экс-старшыні райвыканкама.

“Гэта знятае, я вам кажу дакладна. Наконт астатняга, вы мяне выбачце, я не магу пра гэта размаўляць”.

Крыніца ў ідэалагічных колах Віцебшчыны распавядае Еўрарадыё, што мала хто ведае дакладна, чаму Уладзімірам Булаем зацікавіліся праваахоўнікі.

“Адна з чутак была, што карыстаўся паслугамі прадпрыемстваў, каб зладзіць вяселле сыну, браў нейкія прадукты. Але ці праўда гэта? Мясцовыя жыхары ставяцца да яго па-рознаму. Адны паважаюць, памятаючы яго бацьку, іншыя лічаць, што разваліў папярэдні калгас. Але ўсе гэтыя абмеркаванні — на ўзроўні чутак”, — кажа крыніца.

Як бы там ні было, праца на чале сельгаспрадпрыемства “Кляновічы” для Булая — справа не новая. А вось юрыст Аляксандр Архіпаў да працы ў полі ніколі дачынення раней не меў.

“Няма нічога, што нельга спазнаць і вывучыць. Трэба папрацаваць, а потым ужо абмяркоўваць узровень прадпрыемства”, — адказвае Архіпаў Еўрарадыё.

Падначаленыя Аляксандра Міхайлавіча распавядаюць пра тое, што за справу іх новы шэф узяўся надзвычай грунтоўна. Каб падняць прадпрыемства “Пятровічы” ён і многія іншыя работнікі пакуль працуюць без абеду.

Сваё нечаканае вызваленне Архіпаў тлумачыць проста і запэўнівае, што новае прызначэнне пакараннем не лічыць.

“Не, не і яшчэ раз не. Любы чалавек можа звярнуцца да кіраўніка дзяржавы ў адпаведнасці з законам. Кіраўнік дзяржавы можа памілаваць любога асуджанага, які знаходзіцца ў месцах пазбаўлення волі і не толькі. Гэта было маё асабістае жаданне, пайсці працаваць і прыносіць карысць нашай дзяржаве, не важна, на якім участку. З мяне карона не ўпадзе, дзе б я ні працаваў”, — акцэнтуе ўвагу Аляксандр Міхайлавіч.