Старшыня калегіі — пра звольненых адвакатаў: заняліся палітыканствам
Адвакаты, якіх пазбавілі ліцэнзіі пасля 2020 года, паводзілі сябе непрафесійна. Такую ацэнку даў старшыня Беларускай рэспубліканскай калегіі адвакатаў Аляксей Швакаў.
У інтэрв'ю газеце "СБ. Беларусь сегодня" ён абрынуўся з крытыкай на былых калег: "Паддаліся негатыўнаму ўплыву, які актыўна распаўсюджваўся тады з дапамогай розных інтэрнэт-крыніц, телеграм-каналаў, і некаторыя адвакаты. Скарыстаўшыся публічнасцю (а ў адваката ёсць такая магчымасць, ён можа выступаць у судах, выказваць сваё меркаванне), павялі сябе непрафесійна і заняліся палітыканствам".
Па словах Швакава, некаторыя адвакаты выступалі ад імя ўсёй супольнасці і дыскрэдытавалі яе: "Больш за тое, некаторыя палічылі, што маюць права выступаць ад імя ўсёй адвакацкай супольнасці, дыскрэдытуючы ўвесь інстытут адвакатуры. Калі я займаўся гэтым пытаннем, пытаўся ў іх асабіста: а якое наогул права маеце выступаць ад імя супольнасці? Хто вас ўпаўнаважыў?"
Як паведамлялася раней, з 2020 года больш за паўсотні адвакатаў былі пазбаўленыя ліцэнзій. Часцей за ўсё пазбаўлялі ліцэнзій адвакатаў, якія ўдзельнічалі ў палітычных працэсах або выказваліся наконт сітуацыі ў краіне.
Гэтую зачыстку адвакацкай супольнасці, па словах Швакава, дапамагалі правесці дзяржаўныя органы: "У наступным ва ўзаемадзеянні з дзяржаўнымі органамі мы змаглі справіцца з гэтай тэндэнцыяй і стараемся не дапусціць падобных праяў у нашых шэрагах і сёння".
