Transparency International: карупцыя ў Беларусі — сярод вышэйшага кіраўніцтва

Арганізацыя Transparency International апублікавала свой чарговы штогадовы рэйтынг Corruption Perceptions Index 2020 ("Індэкс успрымання карупцыі"). Беларусь у ім за год паднялася з 66-га на 63-е месца (агулам разглядаюцца 180 дзяржаваў). 

Чым вышэйшае месца ў індэксе, тым менш карупцыі ў краіне. Наша дзяржава знаходзіцца цяпер на адным узроўні з Харватыяй і Кубай.

Сярод суседзяў Беларусі больш высокія паказчыкі ў рэйтынгу маюць Літва (35-е месца), Латвія (42), Польшча (45). Затое Украіна займае 117-ю пазіцыю, а Расія — 129-ю.

У раздзеле, прысвечаным Беларусі, гаворыцца, што індэкс успрымання карупцыі ў краіне паляпшаецца з 2012 года. Таксама складальнікі рэйтынгу падкрэсліваюць, што карупцыя ў Беларусі канцэнтруецца сярод вышэйшага дзяржаўнага кіраўніцтва.

Самыя некарупцыйныя краіны свету ў 2020 годзе, як і годам раней, — Данія і Новая Зеландыя.

Апошнімі ў спісе ідуць Сірыя, Самалі і Паўднёвы Судан. Яны ж, дарэчы, замыкалі і папярэдні спіс.

Індэкс успрымання карупцыі вылічваецца на аснове незалежных апытанняў міжнародных экспертаў, а таксама буйных фінансавых і праваабарончых арганізацыяў. Ён паказвае не ўзровень самой карупцыі, а менавіта стаўленне да яе ў той ці іншай краіне. 

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.