У Брэсце асудзілі пенсіянера за словы "ўпыр чапляецца за ўладу"
Аляксей Афанасьеў / Facebook
Суд Маскоўскага раёна Брэста асудзіў на тры гады калоніі агульнага рэжыму, а таксама штраф у памеры 30 базавых велічынь (1100 рублёў) 67-гадовага Аляксея Афанасьева. Яго прызналі вінаватым у "абразе Лукашэнкі" і "абразе прадстаўніка ўлады". Як піша spring96.org, справу разглядаў суддзя Яўген Брэган, дзяржабвінаваўца — памочнік пракурора Харавец.
Сцвярджаецца, што Афанасьеў пад публікацыяй пра івацэвіцкага міліцыянера Руслана Куцко пакінуў каментар: "Дзярмо". Раней за смайлік-гаўняшку на адрас Куцко ў Івацэвічах судзілі Вольгу Кронда. А яшчэ пенсіянер захаваў сабе на старонцы ў Facebook відэа з удзелам Максіма Каца, дзе выкарыстоўваўся выраз "упыр чапляецца за ўладу". Сілавікі палічылі, што гаворка ідзе пра Аляксандра Лукашэнку.
У Мінску за "абразу Лукашэнкі" асудзілі на два гады "хатняй хіміі" кіроўцу сталічнага транспартнага прадпрыемства Аляксандра Ліпскага.
