Узброены канфлікт у Луганску: міністр унутраных спраў супраць кіраўніка "ЛНР"
У аўторак у цэнтры Луганска з'явіліся групы невядомых людзей у ваеннай форме, узброеныя стралковай зброяй і мінамётамі, піша "Новая газета". Вайскоўцы праігнаравалі загад кіраўніка так званай "Луганскай народнай рэспублікі" Ігара Платніцкага пакінуць горад. Паведамляецца, што вайскоўцы блакавалі доступ да адміністрацыйных будынкаў, супрацоўнікі ўрада і Народнага савета былі распушчаныя па дамах.
Увечары ў горад з боку так званай "ДНР" прыбыла калона з некалькіх дзесяткаў вайсковых машын "Уралаў" з вайскоўцамі.
Прычынай называюць канфлікт паміж кіраўніком "ЛНР" Ігарам Платніцкім і міністрам унутраных спраў Ігарам Карнетам. 20 лістапада Платніцкі адправіў міністра ў адстаўку. Ён абвінаваціў Карнета, што той незаконна пражывае ў прыватным доме, нягледзячы на шматлікія скаргі ўладальніцы.
Аднак кіраўнік МУС сваю адстаўку не прызнаў. Ён заявіў, што ў кіраўніцтве "ЛНР" завялася ячэйка "ўкраінскіх дыверсантаў". Сярод яе ўдзельнікаў былі названыя дырэктар ГТРК "ЛНР" Настасся Шуркаева, кіраўнік адміністрацыі кіраўніка "ЛНР" Ірына Тэйцман і начальнік службы урадавай бяспекі МУС "ЛНР" Яўген Селіверстаў.
Агенцтва РБК са спасылкай на крыніцу з атачэння Уладзіслава Суркова паведамляе, што Крэмль у гэтым канфлікце стаў на бок Ігара Карнета. Але Платніцкага вырашылі пакуль што не здымаць, бо яго подпіс стаіць пад Мінскімі пагадненнямі.
