Журналіст і палітвязень Генадзь Мажэйка асуджаны на 3 гады калоніі

Журналіст і палітвязень Генадзь Мажэйка асуджаны на 3 гады калоніі агульнага рэжыму. Яго прызналі вінаватым у "распальванні сацыяльнай варожасці або варажнечы". Абвінавачвалі і ў "абразе Лукашэнкі", але як піша БЕЛТА, гэтыя матэрыялы вылучаны ў асобную справу. Будуць "устанаўліваць асобу, якая падлягае да прыцягнення ў якасці абвінавачанага".

Крымінальную справу разглядаў Мінскі гарадскі суд (суддзя — Таццяна Фалькоўская, якая летась прысудзіла 8 гадоў калоніі журналістцы і палітзняволенай Ксеніі Луцкінай). Мажэйка ў судзе сваёй віны не прызнаў.

Генадзя Мажэйку затрымалі 1 кастрычніка 2021 года. За тры дні да таго на сайце "Комсомольской правды в Беларуси" з'явіўся артыкул са станоўчай характарыстыкай айцішніка Андрэя Зельцэра, забітага ў Мінску ў перастрэлцы з супрацоўнікамі КДБ (яе дала аднакласніца загінулага). Пасля гэтага сайт выдання быў заблакаваны ў Беларусі. Мажэйку затрымалі ў Маскве і вывезлі ў РБ.