ЗША: Мадура гатовы быў уцякаць, але “рускія сказалі застацца”
Прэзідэнт Венесуэлы Нікалас Мадура гатовы быў пакінуць краіну 30 красавіка на фоне пратэстаў апазіцыі, але Расія адгаварыла яго ад такога кроку. Пра гэта ў інтэрв’ю CNN заявіў дзяржсакратаў ЗША Майк Пампеа.
“Мы назіралі цягам дня, Мадура даўно ніхто не бачыў. У яго быў падрыхтаваны самалёт, ён быў гатовы з’ехаць раніцай, як мы разумеем, але рускія сказалі яму, што ён мусіць застацца”, — сказаў Пампеа.
Паводле яго інфармацыі, Мадура планаваў ляцець у Гавану.
Расійскі МЗС назваў выказванні дзяржсакратара ЗША хлуснёй і абвінаваціў Вашынгтон у спробе дэмаралізаваць венесуэльскае войска. Мадура таксама назваў выступ Пампеа “хлуснёй і манімуляцыяй”.
Лідар апазіцыі Хуан Гуайдо напярэдадні заявіў, што атрымаў падтрымку вайскоўцаў і распачаў заключны этап аперацыі па звяржэнні Нікаласа Мадура. У Каракасе аднавіліся вулічныя пратэсты і сутыкненні з вайскоўцамі. Пазней Мадура заявіў, што спроба дзяржаўнага перавароту правалілася, а Гуайдо запэўнівае, што 1 траўня пратэсты працягнуцца, паведамляе Бі-бі-сі.
