ААН: гэты год стане самым спякотным за ўсю гісторыю назіранняў
Спякота / Еўрарадыё
Гэты год стане самым спякотным за ўсю гісторыю назіранняў, кажа Сусветная метэаралагічная арганізацыя ААН напярэдадні кліматычнага саміту ў Баку.
У дакладзе арганізацыі ёсць і іншыя трывожныя тэзісы. Так, метэаролагі адзначаюць, што акіяны награваюцца хутчэй, чым калі-небудзь. А яшчэ ўзмацняюцца тэмпы раставання ледавікоў. У 2023 годзе яны страцілі больш лёду, чым з пачатку вымярэнняў у 1953 годзе. Жахлівымі тэмпамі растае і марскі лёд.
Метэаролагі адзначаюць, што хоць гэтыя звесткі і выклікаюць непакой, гэта літаральна тое, пра што спецыялісты папярэджвалі на працягу многіх гадоў.
Кліматычная канферэнцыя ААН сёлета пройдзе ў нафтаздабывальнай краіне — Азербайджане. Яна збярэ сусветных лідараў з прыкладна 200 краін.
