Ад бацюшкі на сутках да адціснутага касцёла: за што ў Беларусі прэсуюць святароў

02/12/2022 - 15:29

Часта святары трапляюць пад рэпрэсіі за антываенную пазіцыю / калаж Улада Рубанава

Часта святары трапляюць пад рэпрэсіі за антываенную пазіцыю / калаж Улада Рубанава

З аднымі сілавікі па даносах ладзяць "прафілактычныя гутаркі". Іншыя самі трапляюць у лік рэпрэсаваных. А айца Уладзіслава Багамольнікава фактычна даводзяць да смерці ў ізалятары: у нечалавечых умовах за кратамі яго трымаюць з лета. Праваабаронцы прызналі яго палітвязнем.

Акрамя таго, у вернікаў адабралі Чырвоны касцёл — адну з галоўных каталіцкіх святынь Мінска. Дзверы касцёла зачыненыя, маліцца там забараняюць. Ужо былы пробашч храма Уладзіслаў Завальнюк пайшоў у дворнікі і прыбірае вакол яго снег і апалае лісце.

Еўрарадыё згадвае гучныя і абуральныя выпадкі рэпрэсій у дачыненні да вернікаў.

“Сектант-БЧБшнік”

От батюшки на сутках до отжатого костёла: за что в Беларуси прессуют священников

Алег Нагорны / facebook.com/onmounty

8 лістапада ГУБАЗіК затрымаў праваслаўнага верніка, сектазнаўцу і рэдактара сайта пра секты Алега Нагорнага. Не спадабаліся сілавікам антываенныя тэксты і асуджэнне РПЦ, якая афіцыйна падтрымлівае вайну ва Украіне. Міліцыя ўгледзела ў гэтым "прыкметы распальвання нянавісці па прыкмеце нацыянальнасці да рускіх" і назвала Нагорнага "сектантам-БЧБшнікам".

— Нагорны вучыўся ў Мінскай духоўнай семінарыі ў Жыровічах. Быў лектарам на многіх праваслаўных мерапрыемствах, стварыў пры падтрымцы БПЦ Цэнтр абароны здароўя сям'і і асобы, — піша "Хрысціянская візія".

Сектазнаўцу пакаралі 15 суткамі паводле артыкуле 19.10. КаАП "Прапаганда або публічнае дэманстраванне, выраб, распаўсюджванне нацысцкай сімволікі або атрыбутыкі". Яму ад старту пагражалі крымінальнай справай. Суткі прайшлі, а навін пра вызваленне Нагорнага няма, як і абнаўленняў у яго сацсетках.

“ЯНЫ ЯГО ЗАБІВАЮЦЬ. Фізічна”

Уладзіслаў Багамольнікаў / belstu.by

Святара Уладзіслава Багамольнікава сілавікі даводзяць да пакутніцкай смерці ў ізалятары на Акрэсціна. Яго жорстка затрымалі яшчэ 31 жніўня, калі ён хварэў COVID-19, і з таго часу пастаянна працягваюць суткі. Навуковец Сяргей Гаранін, які сядзеў з ім у адной камеры, напісаў пасля вызвалення, што Багамольнікава проста забіваюць вельмі цяжкімі ўмовамі.

— Ён памрэ... стан здароўя а. Уладзіслава пагоршыўся. Нават калі я вызваляўся і ён паціснуў мне руку, то рука ў яго была нямоглая, пальцы тонкія, усе костачкі ў іх чуваць... Да таго ж ён і галадоўку трымаў... Уладзіслаў — мужны чалавек, і ён трымаецца з годнасцю і моцна. Падтрымлівае іншых. Зрабіць яму яны нічога не могуць. Таксама прад'явіць яму па факце нічога нельга. Ну, ён адслужыў літыю па Раману Бандарэнку — дык што? Гэта пастарскі абавязак... Таму... ЯНЫ ЯГО ЗАБІВАЮЦЬ. Фізічна.

У лістападзе 2020 года Багамольнікаў праводзіў службу па загінулым на "Плошчы Пераменаў" Раману Бандарэнку. Менавіта пра гэты эпізод піша Гаранін — і, імаверна, менавіта праз яго святара прэсуюць сілавікі. Хоць падставай для адміністрацыйных тэрмінаў зрабілі "народныя" артыкулы.

Калі Уладзіслава Багамольнікава затрымалі, праўладныя тэлеграм-каналы пісалі, што святару можа пагражаць крымінальны пераслед. Таксама былі абвінавачванні ў матэрыяльнай дапамозе Украіне. "Фінансаванне УСУ яшчэ сваё важкае слова скажа", — напісаў адзін з прапагандысцкіх ТГ-каналаў.

У каталікоў адабралі Чырвоны касцёл

Ксёндз Уладзіслаў Завальнюк моліцца ля закрытага касцёла / facebook.com/Viktar.Vedzen

Улады не толькі рэпрэсуюць святароў, але і адабралі ў беларускіх каталікоў касцёл святых Сымона і Алены, шырока вядомы як Чырвоны касцёл. Адбылося гэта нібыта ненаўмысна: раніцай 26 верасня загарэлася невялікая прыбудова да храма. А ўжо 5 кастрычніка камунальнае прадпрыемства "Мінская спадчына", якое адказвае за касцёл, заявіла прыходу, што касцёл павінен быць вызвалены да 12 кастрычніка праз рамонт. Аднак ніякіх тэрмінаў заканчэння рамонту не агучвалася.

Пазней плябана парафіі святых Сымона і Алены ксяндза Уладзіслава Завальнюка на прыступках закрытага Чырвонага касцёла спрабавала затрымаць міліцыя. Ён прыйшоў туды проста памаліцца. Калі пытанне ў рамонце пасля пажару, то чаму Завальнюку нельга маліцца ля касцёла, дзе ён быў пробашчам?

Гэта не першы інцыдэнт, звязаны з сілавікамі і касцёлам. Падчас пратэстаў у жніўні 2020 года АМАП заблакаваў уваход у святыню, бо там схаваліся мітынгоўцы. Арцыбіскуп Тадэвуш Кандрусевіч асудзіў сілавікоў, аднак улады не палічыліся з кіраўніком каталіцкай царквы. Праз некалькі дзён Кандрусевіча спынілі на мяжы — не дазволілі вярнуцца ў Беларусь з рабочай паездкі. Лукашэнка заявіў, што арцыбіскуп "атрымліваў пэўныя задачы ў Варшаве". Кандрусевіч вярнуўся дадому толькі ў снежні 2020 года, а потым пакінуў сваю пасаду.

“Апусціўся да падтрымкі тэрарыстычнага рэжыму Украрэйха”

Сярод абсурдных выпадкаў — "прафілактычная гутарка" міліцыі са святаром Андрэем Ноздрыным. На яго ў траўні данесла праўладная актывістка Вольга Бондарава. Яна заявіла, што Ноздрын "апусціўся да падтрымкі тэрарыстычнага рэжыму Украрэйха". Тое, што з беларускай тэрыторыі Украіну абстрэльвалі ракетамі, Бондарава, відаць, тэрарызмам не лічыць.

Гэта далёка не ўсе выпадкі рэпрэсій супраць царквы. Да канца 2022 года сярод палітвязняў — мінімум трое святароў. Акрамя Уладзіслава Багамольнікава, гэта фігурант "справы Аўтуховіча" Сяргей Рэзановіч і пастар баптысцкай царквы "Святло Надзеі" Віталь Чычмароў.