Асуджаны ў Крыме дызайнер збег з паўвострава ў Ізраіль на самалёце
Фота: krym.com
Дызайнер Міхаіл Арлоў, якога 14 лютага Ялцінскі гарадскі суд прысудзиў да трох гадоў пазбаўлення волі за ненаўмыснае забойства двух чалавек, збег з Крыма ў Ізраіль. Пра гэта сам Арлоў распавёў «Новай газеце».
«У дзень прысуду я знаходзіўся ў шпіталі ў Ялце. Калі адвакат паведаміла мне вердыкт, я тут жа вырашыў з'ехаць у Севастопаль, які лічыцца асобным рэгіёнам, якія не ўваходзяць у склад Рэспублікі Крым. Там некалькі дзён я праляжаў у іншай лякарні, прычым без афармлення. На наступны дзень пасля прысуду мне паступіла прапанова пакінуць тэрыторыю Крыма прыватнай авіяцыяй. Імёны дабрадзеяў называць не буду. Зараз я знаходжуся ў Ізраілі, але затрымлівацца тут не збіраюся — маю намер адправіцца ў падарожжа», — сказаў Арлоў.
Па словах дызайнера, ён не баіцца экстрадыцыі ў Расію, паколькі большасць дзяржаў не прызнаюць Крым тэрыторыяй РФ, і, адпаведна, не павінны прызнаваць рашэнне крымскага суда.
«Я таксама спадзяюся, што ў выніку ў маіх адвакатаў атрымаецца аспрэчыць прысуд і дамагчыся апраўдання не толькі для мяне, але і для другога фігуранта справы — адміністратара Аляксандра Фёдарава. Цяпер над гэтым працуюць чацвёра адвакатаў, уключаючы Аляксандра Молахава, які раней прадстаўляў інтарэсы заснавальніка "МММ" Сяргея Маўродзі, чыноўніцы Мінабароны Яўгеніі Васільевай і юрыста Сяргея Магніцкага», — заявіў дызайнер.
Міхаіла Арлова прызналі вінаватым у гібелі двух чалавек у ялцінскім кафэ «BarFly» у ноч з 22 на 23 жніўня 2014 года. Падчас вечарынкі, у якой удзельнічала каля 500 чалавек, адзін з гасцей, 27-гадовы заснавальнік Best DJ Group Арцём Новікаў, забраўся на сцэну да дыджэйскага пульта. Па сведчаннях відавочцаў, ён трымаў у руках шклянку з напоем, і ў танцы разліў напой на электраапаратуру, пасля чаго атрымаў удар токам і памёр. Другі загінулы, 31-гадовы камерцыйны дырэктар будаўнічай кампаніі «Маналіт» Юрый Міроненка, кінуўся ратаваць Новікава, але таксама атрымаў смяротны ўдар токам пасля судакранання з ім.
Следства палічыла, што гібель Новікава і Міроненкі адбылася з-за кантакту з сафітам, да якога не быў падлучаны провад зазямлення. Была ўзбуджаная крымінальная справа па факце аказання паслуг, якія не адказваюць патрабаванням бяспекі. Адказнасць у такім выпадку нясе ўладальнік установы, аднак у выпадку з «BarFly» пад суд пайшоў дызайнер, які распрацоўваў інтэр'ер кафэ. Следчы Аляксей Вайтэнка палічыў, што менавіта Арлоў быў гаспадаром установы, хоць гэта і не было пацверджана дакументамі. Сам дызайнер выстаўленыя абвінавачанні адмаўляў, некаторыя сведкі заяўлялі пра ціск на іх з мэтай прадставіць Арлова вінаватым.
У 2015 годзе Ялцінскі гарадскі суд ужо выносіў прысуд Міхаілу Арлову паводле гэтага абвінавачваньня. Тады яго таксама асудзілі на тры гады пазбаўлення волі, аднак прысуд ня ўстояў у апеляцыйнай інстанцыі: Вярхоўны суд Крыма адмяніў яго, заявіўшы, што следства не даказала ні суб'ектыўнай, ні аб'ектыўнай віны дызайнера ў здарэнні.
