Беларусам прызыўнога веку забароняць выезд з краіны? Гэта можа быць ІПСА

23/04/2024 - 16:26

Салдат тэрміновай службы ў беларускім войску

Салдат тэрміновай службы ў беларускім войску / Міністэрства абароны РБ

BELPOL атрымаў інфармацыю, што беларусам прызыўнога веку забароняць выязджаць з краіны. Чуткі пра гэта хадзілі і раней. Цяпер у арганізацыі беларускіх сілавікоў спасылаюцца на крыніцы ў Мінабароны Беларусі.

Гэтыя крыніцы паведамляюць, што абмежаванне будзе ўведзенае разам з публікацыяй указа аб наступным прызыве, і будзе дзейнічаць да канца прызыву.

Гісторык і палітычны аглядальнік Аляксандр Фрыдман лічыць, што ні сама забарона, ні чуткі пра яе — не на карысць Аляксандру Лукашэнку:

— Занадта ўжо відавочна, што гэта выкліча ў беларускім грамадстве залішні неспакой. А Лукашэнку гэтага не трэба. Яму трэба прадаваць ідэю, што ў Беларусі ўсё спакойна і надзейна, што Беларусь ні ўва што не ўцягваецца. А калі яны прымуць нешта падобнае, можа пачацца паніка.

Беларусы на харкаўскім фронце не патрэбныя

Суразмоўца Еўрарадыё не выключае, што пэўныя катэгорыі людзей могуць сутыкнуцца з тым, што іх будуць разварочваць на мяжы.

— Але не выпускаць усіх? Калі гэта пачнецца, то будзе вельмі кепскім сігналам. Гэта будзе значыць, што мы знаходзімся за некалькі крокаў ад уцягвання Беларусі ў вайну па-сапраўднаму.

Малаверагодна, што Расія вырашыць выкарыстоўваць беларускі рэсурс, проста кінуўшы людзей у баявыя дзеянні. Куды? На харкаўскі фронт? Там яны не патрэбныя. Штурмаваць мяжу з Украінай? Гэта было б дзіўна пры той якасці ўкраінскіх загароджаў і ўсяго арсенала, што там стаіць.

У Расіі дастаткова "гарматнага мяса" — і расіяне пры гэтым лепш падрыхтаваныя і больш матываваныя.

Аднак беларусаў могуць выкарыстоўваць для "шэрых" мерапрыемстваў, кажа аглядальнік. Напрыклад, каб зайсці "па памылцы" на тэрыторыю Польшчы ці Літвы.

Чуткі пра забарону на выезд могуць распаўсюджвацца наўмысна? Але з якой мэтай?

Так, сапраўды, з'яўленне такой інфармацыі ў публічным полі можа быць інфармацыйна-псіхалагічнай спецаперацыяй, лічыць Фрыдман. З аднаго боку, ад такіх звестак адмахвацца нельга. З іншага, гэта можа быць правакацыяй і спробай нанесці рэпутацыйны ўрон дэмакратычным сілам.

— Я б не выключаў, што гэта можа быць прапагандысцкая гульня. Напрыклад, каб паказаць: глядзіце, мы закінулі пагалоску, яны яе растыражавалі! А потым выйдзе чыноўнік Мінабароны і скажа, што ўсё гэта хлусня. І калі на самой справе нічога такога не здарыцца, гэта падарве давер.

Успомніце заяву Валерыя Сахашчыка, што Беларусь рыхтуе напад на Літву. Пасля таго, як усе гэта абмеркавалі, гісторыя сышла на нішто і, верагодна, нанесла пэўную шкоду рэпутацыі.

Але з іншага боку, я добра разумею і BELPOL, і Сахашчыка: калі яны атрымалі гэтую інфармацыю, было б дзіўна і некарэктна яе не агучваць. Нельга маўчаць, бо калі гэта праўда, то на кон кладуцца жыцці людзей.