Беларусам забараняюць гуляць у "Што? Дзе? Калі?" і "Брэйн-рынг" без дазволу
![Алесь Мухін / ont.by](/sites/default/files/styles/gallery_main/public/2023-08/kvdD3u9HTBNu8LN8.jpg.webp?itok=V9qHPZev)
Алесь Мухін / ont.by
Алесь Мухін і яго партнёр забараняюць беларусам гуляць у "Што? Дзе? Калі?" і "Брэйн-рынг" без дазволу. Яны сцвярджаюць, што ім належаць правы не толькі на назвы гульняў, але і на выразы "Увага, пытанне!" і "Увага, дакладны адказ!".
Ліст такога зместу атрымала як мінімум адна беларуская арганізацыя. Там вядзецца, што брэндамі "Што? Дзе? Калі?" і "Брэйн-рынг" валодае маскоўская "Телекомпания Игра-ТВ". Права карыстацца імі на тэрыторыі Беларусі яна перадала кампаніі "Игра-ТВ Бел", праз якую "Што? Дзе? Калі?" здымаецца для тэлеканала АНТ. За гэтай фірмай стаіць Алесь Мухін.
Таксама ў лісце згаданы партнёр Мухіна, ІП Андрэй Куляшоў. Менавіта ён "ажыццяўляе выдачу дазволаў" на правядзенне "Што? Дзе? Калі?" і "Брэйн-рынга" ў Беларусі, а таксама сам арганізуе такія турніры.
У "Што? Дзе? Калі?" (што праўда, спартовую версію, а не тэлевізійную) гуляюць тысячы беларускіх школьнікаў і студэнтаў. Па ўсёй краіне працуе сістэма дзяржаўных гурткоў па інтэлектуальных гульнях. Ці датычацца абмежаванні іх — у лісце не ўдакладняецца.
Каб сачыць за галоўнымі навінамі, падпішыцеся на канал Еўрарадыё ў Telegram.
Мы штодня публікуем відэа пра жыццё ў Беларусі на Youtube-канале. Падпісацца можна тут.