Беларуская футбольная зборная перамагла двойчы запар. Поспех або шанцаванне?

На думку журналіста, стыль і тактыка гульні ў каманды не змяніліся. А статыстыка нават крыху пагоршылася ў параўнанні з гульнёй каманды Кандрацьева.

— І Алос, і Кандрацьеў правялі па матчы ля стырна зборнай менавіта супраць Косава, абодва матчы, дарэчы, завяршыліся перамогай. Але статыстычна ў гэтай дуэлі перамог Кандрацьеў: яго каманда больш кантралявала мяч, стварала небяспечныя моманты, шмат пасавала.

І ў цэлым паказчыкі Алоса даволі сціплыя, магу меркаваць, што цяпер яму проста шанцуе. Калі б зборная Беларусі ў кожным матчы так якасна рэалізоўвала свае моманты — гэта быў бы добры еўрапейскі ўзровень, — запэўнівае Алег.

Гаруновіч лічыць, што казаць пра перспектывы Алоса ў зборнай занадта рана. Паводле яго слоў, любая параза можа зноў пасеяць у гульцах няўпэўненасць у сваіх сілах і ў трэнеры.

— Цяперашняя беларуская зборная — гэта абарончая каманда, якой уласціва трываць, гуляць на стрымліванне суперніка. Узяць нават матч са Швейцарыяй, дзе дзякуючы цудоўнай рэалізацыі беларусы ў нейкі момант нават вялі з лікам 3:1. Аднак добрая рэалізацыя і шанцаванне могуць быць і ў суперніка, таму такая тактыка — не заўсёды добрая ідэя.

А што тычыцца мэтаў і задач новага трэнера, я не думаю, што яны рэальна плануюць адабрацца на чэмпіянат свету ці Еўропы ў будучыні. Мне здаецца, план, якога павінная трымацца зборная, — выходзіць і думаць пра тое, як не "аблажацца" з тым ці іншым супернікам.

Карлас Алос — трэнер-гастралёр

Беларускі журналіст, блогер і вядоўца YouTube-канала «Честнок» Яраслаў Пісарэнка ўпэўнены, што апошнія вынікі зборнай Беларусі непасрэдна звязаныя з прызначэннем Карласа Алоса.

— Алос непасрэдна ўплывае на атмасферу ў камандзе, размаўляе з футбалістамі, спрабуе прышчапіць ім ментальнасць пераможцаў. Ён не змяніў стыль гульні, але паспрабаваў падабраць максімальна якасных гульцоў і згуртаваць іх. Напрыклад, у матчы са зборнай Косава каэфіцыент чаканыя галоў у беларусаў быў каля 0.03, але ўсё адно была здабытая перамога. Калі раней яны прайгравалі там, дзе маглі перамагчы, то цяпер выйграюць, хоць, паводле логікі, павінны былі прайграць. І гэта таксама свайго роду круты футбольны скіл, — кажа журналіст.

Пісарэнка перакананы: цяперашні поспех — гэта 100% кароткатэрміновы эфект. А на дыстанцыі трэба выбудоўваць сістэму, якой пакуль няма.

— Наогул прызначэнне Алоса на пасаду стырна зборнай мяне вельмі здзівіла. З 2015 года гэты трэнер змяніў 8 клубаў, нідзе доўга не затрымліваючыся. У футбольным свеце такіх называюць "трэнер-гастралёр". Таму я б скептычна ставіўся да сцвярджэння, што ён тут сур'ёзна і надоўга.

Цяпер усё складваецца выдатна, аднак меркаваць з першых чатырох гульняў — дрэнная ідэя. А пра барацьбу за чэмпіянат свету ў наступнай кваліфікацыі наогул казаць забаўна, — рэзюмаваў Яраслаў.

"Шанцаў адабрацца на буйны міжнародны турнір у гэтай зборнай не будзе ніколі ў жыцці"

Былы беларускі футбаліст Андрэй Карбоўскі таксама лічыць, што вынік прыйшоў менавіта дзякуючы новаму галоўнаму трэнеру.

— Хутчэй за ўсё, сапраўды былі ўнесеныя невялікія карэктывы, але ў цэлым гульні як не было, так і няма. Перш за ўсё Алос — нядрэнны матыватар, магу меркаваць, што ён са сваім іспанскім тэмпераментам зарадзіў і футбалістаў. Ці будзе ад гэтага нейкая карысць? Не ведаю, але шанцаў адабрацца на буйны міжнародны турнір, пры ўсёй павазе, у гэтай зборнай не будзе ніколі ў жыцці. Гульцоў, якія рэальна маглі б цягнуць, няма. Напрыклад, Ілля Шкурын ніколі не пойдзе гуляць за гэтую зборную. А без такіх футбалістаў шанцы на поспех роўныя нулю.