Беларускі Чырвоны Крыж скарачае дапамогу мігрантам, бо мае праблемы з фінансамі

Беларускае таварыства Чырвонага Крыжа прыпыняе грашовую падтрымку бежанцаў і мігрантаў. У заяве арганізацыі гэты крок тлумачыцца спыненнем супрацоўніцтва з партнёрамі.

БКК перастане выдаваць бежанцам ваўчары, кампенсаваць выдаткі на медпаслугі і аплачваць адпачынак дзяцей летам. Пры гэтым у арганізацыі дадаюць, што працягнуць аказваць бежанцам і мігрантам гуманітарную дапамогу — выдаваць адзенне, абутак, сродкі гігіены.

Як распавядала Еўрарадыё, Міжнародная федэрацыя таварыстваў Чырвонага Крыжа і Чырвонага Паўмесяца 1 снежня прыпыніла сяброўства Беларускага Чырвонага Крыжа і пазбавіла фінансавання. Гэта адбылося ў сувязі з тым, што ў БЧК не захацелі пераабіраць скандальна вядомага кіраўніка таварыства Дзмітрыя Шаўцова, які ездзіў на Данбас у вопратцы з літарай Z і прызнаўся ў вывазе дзяцей з Украіны.

Паводле справаздачы БЧК за 2022 год, замежнае фінансаванне арганізацыі складала 57,2% бюджэту. Агульная сума дапамогі — амаль 13 мільёнаў рублёў.

ААН шукае ў Беларусі арганізацыю, якая магла б замяніць БЧК у міжнародных праектах.