Брэсцкі мытнік краў моцнадзейныя прэпараты

У Брэсце вынеслі абвінаваўчы прысуд па справе аб крадзяжы і продажы моцнадзейных прэпаратаў, паведамляе сайт Генпракуратуры.

Фігурантамі справы сталі мытнік Ш. і яго прыяцель-брастаўчанін Ц. Паводле звестак пракуратуры, у чэрвені 2022-га мытнік з выкарыстаннем службовага становішча скраў партыю прэпаратаў, у тым ліку моцнадзейных. 6 ліпеня ён прадаў іх за 3335 долараў свайму знаёмаму.

Праўда, на наступны дзень дома ў гэтага прыяцеля адбыўся ператрус, і міліцыянты канфіскавалі набытыя рэчывы.

Падчас следства выявілася, што Ц. і раней займаўся набыццём і збытам моцнадзейных рэчываў. У 2020 годзе ён, напрыклад, спрабаваў пераслаць 103 таблеткі ў ЗША.

Мытніка асудзілі на 5 гадоў пазбаўлення волі і аштрафавалі на 37 000 рублёў (1000 базавых велічыняў). Яму забаранілі займаць пэўныя пасады на 5 гадоў, а таксама спагналі даход, атрыманы незаконным шляхам. Яго прыяцелю прысудзілі 6 гадоў пазбаўлення волі і аштрафавлі таксама на 37 000 рублёў.