ЦРУ стварыла тэлеграм-канал, каб вербаваць расіян
ЦРУ пачало актыўна вербаваць расіян / Global Look Press
Цэнтральнае разведвальнае ўпраўленне ЗША (ЦРУ) стварыла тэлеграм-канал, каб вербаваць расіян для супрацы.
Таксама ведамства зняла відэаролік, у якім заклікае расіян дзяліцца інфармацыяй. Відэа апублікаванае ў акаўнтах ЦРУ ў розных сацсетках.
У тлумачэнні да роліка амерыканская спецслужба кажа, што паказвае выдуманых расіян, якія "прынялі цяжкое, але важнае рашэнне негалосна выйсці на кантакт з ЦРУ праз ананімную інфармацыйную сістэму Tor". Ведамства падкрэслівае, што хоча ведаць праўду пра Расію.
"Вы вайсковы афіцэр? Вы працуеце ў сферы разведкі, дыпламатыі, навукі, высокіх тэхналогій або маеце справу з людзьмі, якія гэтым займаюцца? У вас ёсць інфармацыя пра эканоміку або вышэйшае кіраўніцтва Расійскай Федэрацыі? Звяжыцеся з намі. Магчыма, людзі вакол вас не хочуць чуць праўду. Мы — хочам", — гаворыцца ў тлумачэнні ЦРУ.
Афіцыйная прадстаўніца МЗС РФ Марыя Захарава, каментуючы стварэнне гэтага тэлеграм-канала, назвала яго "вельмі зручным рэсурсам для адсочвання тых, хто звяртаецца".
