Дар'я Домрачава і Оле-Эйнар Б'ёрндален узялі шлюб
![Дар'я Домрачава і Оле-Эйнар Б'ёрндален узялі шлюб](/sites/default/files/styles/gallery_main/public/2023-08/13728963_1031601170221295_2585413464676610608_n.jpg.webp?itok=Iox9DgKu)
Дар'я Домрачава і Оле-Эйнар Б'ёрндален узялі шлюб. Шлюбнае фота знакаміты нарвежскі біятланіст апублікаваў у Facebook. "Які цудоўны дзень", — так ён яго падпісаў на нарвежскай, англійскай і рускай мовах. Пра месца, дзе прайшла цырымонія, Б'ёрндален не паведаміў.
Дар'і Домрачавай 3 жніўня споўніцца 30 гадоў. Яна — трохразовая алімпійская чэмпіёнка, уладальніца Крышталёвага глобуса (у сезоне 2014/2015 гадоў), Герой Беларусі. Оле-Эйнару Б'ёрндалену 42 гады. Ён — адзін з самых вядомых біятланістаў апошніх дзесяцігоддзяў, васьміразовы алімпійскі чэмпіён. Біятланісты пазнаёміліся падчас Алімпіяды 2010 года ў Ванкуверы. На той час Б'ёрндален быў у шлюбе з італьянскай біятланісткай Наталі Сантэр, дзяцей у іх не было. У 2012 годзе нарвежац развёўся. Тады ж упершыню з'явіліся чуткі пра блізкія адносіны Домрачавай і Б'ёрндалена.
У кастрычніку 2016 года Дар'я Домрачава і Оле-Эйнар Б'ёрндален павінны стаць бацькамі. З 2017 года яны збіраюцца жыць у Беларусі, ва ўласным доме, які будуецца пад Мінскам.
![Дар'я Домрачава і Оле-Эйнар Б'ёрндален узялі шлюб](/sites/default/files/paragraphs/image/1402888627ria.jpg)