Для беларусаў, якія прылятаюць у Расію, усё ж адмянілі ПЛР-тэсты
"Белавія" раней ужо анансавала адмену ПЛР-тэстаў для беларусаў, якія ляцяць у РФ / @belavia_official
Грамадзянам Беларусі больш не трэба рабіць ПЛР-тэсты на COVID-19 перад палётам у Расію. Такое рашэнне прыняў расійскі аператыўны штаб па папярэджанні завозу і распаўсюду новай каранавіруснай інфекцыі. Чарговае пасяджэнне штаба адбылося сёння, паведамляе сайт урада РФ.
Пры гэтым для іншых замежнікаў гэтае правіла — прад'явіць па прылёце ў Расію вынікі ПЛР-тэставання — захоўваецца.
Нагадаем, у сярэдзіне чэрвеня ўжо з'яўлялася інфармацыя, што на рэйсах з Беларусі ў Расію больш не будуць правяраць ПЛР-тэсты і даведкі пра вакцынацыю. Пазней у прэс-службе "Белавія" ўдакладнілі, што тэсты і даведкі ўсё ж патрэбныя.
Пры ўездзе ў Расію праз сухапутную мяжу абавязковыя ПЛР-тэсты скасавалі яшчэ ў красавіку.
