"Ежедневник" — Лукашэнку: вы абяцалі падтрымку Сацуку ў барацьбе з карупцыяй

01/04/2020 - 07:47

Рэдакцыя анлайн-газеты "Ежедневник" звярнулася з адкрытым лістом да кіраўніка Беларусі. Журналісты заклікаюць Аляксандра Лукашэнку выканаць сваё абяцанне, дадзенае Сяргею Сацуку ў 2015 годзе, спыніць крымінальную справу супраць яго і выпусціць на волю.

Калегі Сацука згадваюць, што на прэс-канферэнцыі 29 студзеня 2015 года кіраўнік дзяржавы публічна абяцаў журналісту сваю падтрымку ў барацьбе з карупцыяй. "Што датычыць вось такой вось лабавой атакі на карупцыю, вы атрымаеце самую рэальную падтрымку. Гэта я вам абяцаю", — цытуюць яны словы Лукашэнкі.

Сяргея Сацука 25 сакавіка 2020 года затрымалі супрацоўнікі Дэпартамента фінансавай разведкі Камітэта дзяржкантролю. 31 сакавіка прэс-служба КДК паведаміла, што журналіста вінавацяць у атрыманні хабару ў 5000 долараў. Нібыта, ён узяў гэтыя грошы за напісанне артыкула з кампраметуючай інфармацыяй.

Гэтыя абвінавачанні калегі лічаць абсурднымі і надуманымі. "Сяргей Сацук з'яўляецца сумленным і прыстойным журналістам, які спецыялізуецца на журналісцкіх расследаваннях. Яго характэрнай асаблівасцю заўсёды з'яўлялася імкненне дакапацца да ісціны, непадкупнасць і поўная незалежнасць яго творчасці ад палітычнай барацьбы ў краіне. За гэта яму пастаянна дастаецца — як ад чыноўнікаў, так і ад апазіцыі, і нават ад калег", — пішуць яны. Па словах калег, менавіта гэтая прынцыповасць паспрыяла таму, што да Сяргея Сацука ішлі людзі з матэрыяламі пра карумпаваных чыноўнікаў.

Яны падкрэсліваюць, што журналіст ніколі не ўдзельнічаў у мутных карупцыйных схемах па дзялёжцы дзяржбюджэту: "Наадварот, праводзячы журналісцкія расследавання ў сферы карупцыі, ён увесь час перашкаджаў карупцыянерам вяршыць іх таемныя справы, за што, на нашу думку, цяпер і расплачваецца".

Як прыклад бескарыслівасці калегі загдваюць, што сваё ўласнае першае жыллё Сяргей Сацук займеў толькі ў 2016 годзе, калі яму было 48 гадоў і ў яго з'явіўся ўнук. Да таго ён жыў з сям'ёй у арандаваных кватэрах. "Але цяпер ён вымушаны прадаваць свой сціплы дом у вёсцы, бо не можа разлічыцца з даўгамі і далей утрымліваць гэтую жылплошчу. А яго затрыманне і арышт наогул ставяць на мяжу выжывання ўсю яго сям'ю", — апісваюць сітуацыю журналісты.

Сацук абвясціў збор грошай на журналісцкія расследаванні, але падкрэсліў, што не бярэ ніякіх абавязальніцтваў перад ахвяравальнікамі. "Пры гэтым ён публічна паказаў рэквізіты, куды можна пералічваць грошы, і адкрыта заявіў, што задэкларуе ўсе атрыманыя грошы і выплаціць з іх падаткі", — адзначаюць калегі.

Артыкул, які следства лічыць замоўленым і за які Сацуку нібыта заплацілі, яго паплечнікі называюць адпаведным усім патрабаванням, якія ставяцца перад журналісцкімі расследаваннямі. "Факты пераправераныя і дакладныя. Героям публікацыі дадзеная магчымасць выказаць свой пункт гледжання і абвергнуць факты. Але яны не абверглі гэтыя факты, а толькі заявілі, што так працуюць усе. У публікацыі завастраецца ўвага, што справа не ў гэтых трох кампаніях, ёсць і іншыя. Проста апісаць іншыя ў адным артыкуле фізічна немагчыма", — падкрэсліваецца ў лісце.

На думку журналістаў, праваахоўныя органы скіравалі свае сілы "не на барацьбу з карупцыянерамі, а на барацьбу з вядомым ворагам карупцыянераў, выдаткоўваючы на гэта проста каласальныя чалавечыя і грашовыя рэсурсы".

Пад просьбай вызваліць Сяргея Сацука і спыніць яго крымінальны пераслед падспісаліся заснавальнікі партала "Ежедневник" Аляксандр Сацук, Вадзім Сяховіч, Андрэй Александровіч, Аляксандр Аксёнаў.

Каб сачыць за галоўнымі навінамі, падпішыцеся на канал Еўрарадыё ў Telegram.

Мы штодня публікуем відэа пра жыццё ў Беларусі на Youtube-канале. Падпісацца можна тут.