"Гутарка аб неабходнасці працаўладкавацца". Нашто міліцыя ходзіць да "дармаедаў"

Міліцыя пачала хадзіць па кватэрах тых, каго дзяржава прызнала "дармаедамі" і прымушае ўстаць на ўлік у цэнтр занятасці.

Яны ладзяць гутаркі, запісваюць звесткі і нават запалохваюць тым, што цяпер "дармаеды" могуць пазбавіцца бясплатнай медыцынскай дапамогі.

Еўрарадыё патэлефанавала ў міліцыю і даведалася, што стаіць за такімі рэйдамі і ці варта баяцца.

"Ну а што, чалавек не працуе і павінен нейкімі дабротамі карыстацца..."

Пад выглядам занепакоенага грамадзяніна тэлефануем у выпадковыя РАУС у Беларусі. Пасля некалькіх няўдалых спробаў пагаварыць з міліцыянтамі з Глыбокага і Горак датэлефаноўваемся ў Нясвіж. Трубку здымае дзяжурны, чуе наша пытанне і нераключае на начальніка ўчастковых.

Той, выслухаўшы нашу легенду, кажа, што калі да "дармаеда яшчэ не прыходзілі — значыць, прыйдуць".

— Калі будзеце ў спісе цэнтра занятасці, упраўлення па працы — прыйдзем і да вас. А калі вы афіцыйна працаўладкаваны, то прынясіце свой дагавор у цэнтр занятасці — і тады вас выкрасляць з такога спісу.

— Гэта цяпер такія праверкі ладзяцца?

— Чаго праверкі? Слухайце, калі вас цікавіць якая-небудзь інфармацыя — прыходзьце самі ў РАУС.

— Значыць, міліцыя будзе наведваць. Будуць ладзіцца гутаркі. Але адміністрацыйнай і крымінальнай адказнасці за гэта няма. Ну наогул чалавека так, просяць працаўладкавацца. На біржы працы ёсць вакансіі з заробкам і ад 1000 рублёў.

У некалькіх іншых РАУС пацвердзілі, што міліцыя сапраўды наведвае "дармаедаў". Многія супрацоўнікі таксама заявілі, што "калі да вас яшчэ не прыходзілі — значыць, хутка прыйдуць".

Чаму міліцыя пайшла па дамах "дармаедаў" у Беларусі?

7 лютага 2025 года міністр унутраных спраў Беларусі Іван Кубракоў заявіў, што трэба абнавіць інфармацыю ў базе дадзеных працаздольных асоб, не занятых у эканоміцы.

— Асобную ўвагу нададуць тым, хто працуе за мяжой. Узмоцніцца кантроль за так званымі дармаедамі.

Аднак у адным з РАУС нам паведамілі, што калі чалавек працуе ў Расіі, дастаткова падаць у цэнтр занятасці працоўны дагавор. Таксама ў РАУС запэўнілі, што тым, хто афіцыйна працаўладкаваны, турбавацца няма пра што.

"Люстэрка" раней пісала, што калі беларус знайшоў працу альбо паступіў на вучобу за межамі ЕАЭС (напрыклад, у Польшчы ці Літве), у Беларусі ён афіцыйна лічыцца "не занятым у эканоміцы".

Праверыць, ці ёсць чалавек у базе "дармаедаў", можна анлайн праз сайт "Е-Паслуга", але для гэтага спатрэбіцца лічбавы подпіс.