Ізраільцянін аб'явіў узнагароду за арышт карнікаў, якія яго катававалі ў РБ

Ізраільцянін Аляксандр Фруман аб'явіў узнагароду за арышт карнікаў, якія яго катавалі ў Беларусі пасля затрымання 10 жніўня 2020 года — у Савецкім РУУС Мінска і турме ў Жодзіне. З дапамогай кіберпартызанаў ён высветліў іх асобы. У спісе 9 сілавікоў. Фруман зрабіў на сваім сайце нечаканую для нашых часоў абвестку. Дапамогу ў арышце згаданых міліцыянераў ён ацаніў у $25 тысяч. 

Аляксандр Фруман нарадзіўся ў Беларусі, але даўно ўжо пераехаў у Ізраіль і стаў грамадзянінам гэтай краіны. 10 жніўня 2020-га ён разам з жонкай ішоў па праспекце Незалежнасці ў Мінску — і сфатаграфаваў аўтобус, у якім былі сілавікі. Да яго адразу падбеглі невядомыя ў чорным. "Нас збілі і кінулі ў аўтазак, працягваючы наносіць удары дубінкамі", — расказваў ён пра пачатак той жахлівай гісторыі. На просьбу патэлефанаваць у амбасаду адказвалі лаянкай і антысеміцкімі жартамі. На волю мужчына выйшаў толькі праз трое сутак.