КДБ спыніў крымінальную справу ў дачыненні шасці маладафронтаўцаў
![КДБ спыніў крымінальную справу ў дачыненні шасці маладафронтаўцаў](/sites/default/files/styles/gallery_main/public/2023-08/kgb01080812.jpg.webp?itok=leSI5iLa)
КДБ Беларусі спыніў крымінальную справу “аб падрыхтоўцы масавых беспарадкаў” (ч. 3 арт. 293 КК) у дачыненні шасці маладафронтаўцаў. Былыя зняволеныя следчых ізалятараў дзяржбяспекі і МУС атрымалі паведамленні аб адсутнасці ў іх дзеяннях складу злачынства. Раней падобныя дакументы атрымалі Зміцер Дашкевіч, Сяргей Пальчэўскі, Раман Васільеў, цяпер — Зміцер Крэмянецкі, Уладзімір Яроменак і Арцём Леўчанка, інфармуе сайт spring96.org.
Праваабаронцы звяртаюць увагу, што крымінальны пераслед спыняецца ў дачыненні толькі да тых фігурантаў справы “аб падрыхтоўцы масавых беспарадкаў”, якім не выстаўлялася дадатковае абвінавачанне па артыкуле “Стварэнне незаконнага ўзброенага фармавання” (арт. 287 КК). У следчых ізалятарах КДБ і МУС застаюцца яшчэ 14 чалавек, якія былі затрыманыя ў сакавіку 2017 года па “справе патрыётаў”.
![КДБ спыніў крымінальную справу ў дачыненні шасці маладафронтаўцаў](/sites/default/files/paragraphs/image/dakkgb.jpg)