Кіраўнік Акадэміі навук прыдумаў "беларускі свет"
Уладзімір Гусакоў / sb.by
У навуковае абарачэнне ўводзіцца такое паняцце, як "беларускі свет". Пра гэта на моладзевым навуковым форуме "Беларускі свет: погляд навукі і праваслаўя" заявіў старшыня Прэзідыума Нацыянальнай акадэміі навук акадэмік Уладзімір Гусакоў.
Паводле яго слоў, якія перадае БЕЛТА, гэтае паняцце "ўключае ў сябе цэлую сістэму агульнанацыянальных каштоўнасцяў — ад старажытнай гісторыі і культуры да сучаснай светабудовы, уключаючы традыцыйны светапогляд нашага народа".
Асаблівасцямі гісторыі Беларусі ён назваў скрыжаванне некалькіх культур і дзяржаўных утварэнняў, якія вызначалі развіццё еўразійскай прасторы, і ўключэнне ў беларускае насельніцтва прадстаўнікоў розных этнасаў і нацыянальнасцяў. Таксама Гусакоў заявіў, што з цягам часу беларускі народ набыў высокую ступень устойлівасці да разбуральных умоў транзітнага існавання.
Кіраўнік НАН мяркуе, што цяпер "беларускі свет" трэба сістэмна асэнсаваць і ўсебакова ды ўзмоцнена вывучаць.
