Лукашэнка патрабуе ад сілавікоў звярнуць увагу на тых, "хто не працуе"

Аляксандр Лукашэнка заклікаў сілавікоў "сур'ёзна паставіцца" да тых беларусаў, якія сёння не працуюць. "Гэта дакладна злачынца, нічога не трэба даказваць: калі ён сёння не працуе, дзе ён бярэ на жыццё? Ясна дзе", — заявіў ён на нарадзе з сілавым блокам. Лукашэнка таксама застаўся незадаволены колькасцю злачынстваў, звязаных з махлярствам. Паводле яго слоў, колькасць пацярпелых ад махляроў павялічылася ў два разы.

"Амаль у пяць разоў узрасла колькасць пенсіянераў, пацярпелых ад так званых тэлефонных махляроў", — расказаў Лукашэнка. Ён таксама пацікавіўся, "якія захады плануе зрабіць наша міліцыя сумесна з іншымі дзяржаўнымі органамі ў гэтым кірунку". Пенсіянераў, з яго слоў, трэба абараніць.

Яшчэ Лукашэнка прызнаўся, што яго насцярожваюць факты злачынстваў сярод вайскоўцаў. Фігурантамі спраў робяцца афіцэры розных сілавых структур. "У цэлым у нас не ўсё гладка наогул з вайсковай дысцыплінай. Мы выдатна бачым і разумеем усё, што адбываецца на рубяжах нашай краіны. Пытанне: ці ў поўнай меры мы забяспечваем бяспеку нашай дзяржавы і грамадзян?" — задаў Лукашэнка пытанне ўдзельнікам нарады і сказаў, што чакае канкрэтных прапаноў па навядзенні парадку.