Маякоўскі ў джазе і ў рэпе ад Змітра Вайцюшкевіча: выйшаў альбом “Люблю” (аўдыё)
Зміцер Вайцюшкевіч выпусціў новы альбом “Люблю” на вершы Уладзіміра Маякоўскага. Гэта другое прычыненне беларускага музыкі да творчасці рускага паэта. Першы “сумесны” LP, “MW”, выйшаў у 2005 годзе. Новы дыск “Люблю” — адначасова праца над памылкамі і крок наперад.
“Ён больш разнастайны па стылях: ад джазу і акадэмічнай музыкі да альтэрнатыўнага року ды хіп-хопу, — распавядае Вайцюшкевіч. — Да таго ж мінулым разам было зашмат словаў, а цяпер я хацеў больш музыкі. Ну, і некалькі песень з першага альбома нанова перарабіў. Як мне падаецца, больш удала”.
На альбоме “Люблю” вершы Маякоўскага двойчы гучаць па-беларуску: “Паслухайце” у перакладзе Рыгора Барадуліна і “Размова з фінінспектарам аб паэзіі” у перакладзе Віталя Рыжкова.
“Можна наогул сказаць, што альбом “Люблю” — гэта “супольны праект”. У яго запісе бралі ўдзел музыкі гуртоў WZ-Orkiestra, Apple Tea, “Крама”, а таксама беларуска-амерыканскі віяланчэліст Марк Прыходзька, гітарысты Сціў Крамер і Майк Рубін, хор “Канкордыя”. Большасць з іх будзе граць і на канцэртнай прэзентацыі. Таму канцэрт сапраўды ўнікальны”, — звяртае ўвагу Вайцюшкевіч.
Канцэртная прэзентацыя дыска адбудзецца ў зале “Ок16” (вул. Кастрычніцкая, 16). У першай частцы прагучыць новы альбом, у другой — лепшыя песні з іншых дыскаў Вайцюшкевіча.
