МЗС Беларусі адпісалася ад "экстрэмістаў" у твітары, астатнія чыноўнікі — не
Прэс-сакратар МЗС Анатоль Глаз. Магчыма, ён і адказвае за твітар ведамства / Sputnik
МЗС Беларусі адпісалася ў твітары ад "экстрэмісцкіх фармаванняў" "Наша ніва" і БелаПАН, а таксама ад вытворцаў экстрэмісцкага кантэнту "Зеркало", TUT.by, DW. Гэта адбылося адразу пасля публікацыі на Еўрарадыё пра твітарскія падпіскі чыноўнікаў, сілавікоў і дыпламатаў.
У Беларусі дзейнічае заканадаўства, згодна з якім падабайка або рэпост у сацсетках кантэнту СМІ, абвешчанага ўладамі "экстрэмісцкім", пагражае адміністрацыйным арыштам. А падпіска на сацсеткі, абвешчаныя "экстрэмісцкім фармаваннем", пагражае сямю гадамі калоніі. Чыноўнікі і дэпутаты самі ўвялі такія законы, а цяпер самі ж і парушаюць. Аднак, калі "ў краіне не да законаў", дзейнічаюць падвойныя стандарты: пакаранне чакае толькі праціўнікаў дзейнай улады, а на "сваіх" сілавікі глядзяць праз пальцы.
На твітар Еўрарадыё ў МЗС Беларусі падпіскі не было. Выходзіць, ведамства Уладзіміра Макея сочыць за "экстрэмістамі" (так-так, нас таксама ўнеслі ў гэты спіс) і без твітара. Дзякуй за прызнанне кіраўніку прэс-службы міністэрства Анатолю Глазу!
Іншыя міністэрствы і чыноўнікі з нашага тэксту падпіскі не чысцілі. Напрыклад, МУС — усё яшчэ ўдзельнік "экстрэмісцкіх фармаванняў" "Революционное действие", Еўрарадыё і БелаПАН.
