На палігоне ў Беларусі расіяне выкарыстоўваюць сімвалы агрэсіі супраць Украіны

На палігоне ў Беларусі расіяне выкарыстоўваюць сімвалы агрэсіі супраць Украіны. На шлемах вайскоўцаў, якія праводзілі трэніроўкі перад беларускімі і расійскімі журналістамі, можна пабачыць знакі Z і V (ва Украіне іх параўноўваюць з нацысцкай свастыкай). Фотарэпартаж апублікавала прэс-служба Мінабароны РБ.

Начальнік галоўнага ўпраўлення баявой падрыхтоўкі Узброеных сіл РБ генерал-маёр Аляксандр Бас пацвердзіў, што расіян трэніруюць больш за 500 беларускіх інструктараў (пра 500 афіцэраў гаварыў нядаўна Аляксандр Лукашэнка).

"І беларусы і расіяне гатовыя да выканання задач па абароне саюзнай дзяржавы ў любы момант і ў любых умовах абстаноўкі, — самаўпэўнена кажа Бас. — Гэта ў інтарэсах як Узброеных сіл Рэспублікі Беларусь, так і Расійскай Федэрацыі. Задача ў нас адна: плячо ў плячо з нашымі расійскімі братамі ў выпадку любой агрэсіі супраць саюзнай дзяржавы абараніць нашы народы".